“ჩვენი მოქალაქეები უფასო ჩარტერული რეისებით დაბრუნდებიან სამშობლოში…” – ვაშაძე

„ერთიანი ნაციონალური მოძრაობის“ თავმჯდომარე გრიგოლ ვაშაძე სპეციალურად გამართულ ბრიფინგზე განცხადებას ავრცელებს და ამბობს, რომ საშუალება აქვთ, საქართველოს მოქალაქეები სამშობლოში უფასოდ ჩამოიყვანონ.

მისი თქმით, 31 მარტიდან, ევროპის სხვადასხვა ქალაქიდან ოთხი ჩარტერული რეისი განახორციელებას შეძლებენ.

„გასულ ორშაბათს, „ერთიანმა ნაციონალურმა მოძრაობამ“ დაიწყო აღრიცხვა ის მოქალაქეების, ვისაც არ აქვს არანაირი სახსრები და ვერ ბრუდნებიან სამშობლოში. ისინი ფაქტობრივად, ქუჩაში არიან და უნდათ სამშობლოში დაბრუნება. მიხეილ სააკაშვილი პირდაპირ გადავიდა კონკრეტულ ნაბიჯებზე და უმოკლეს ვადაში მოიძია უკრაინული ავიაკომპანია „sky up” და მეორე, სახსრები, რომლებიც საშუალებას მისცემს ჩვენს მოქალაქეებს უფასო ჩარტერული რეისებით დაბრუნდნენ სამშობლოში.

საშუალება გვაქვს 31 მარტიდან განვახორციელოთ 4 რეისი:

31 მარტი – ვარშავა-კიევი-თბილისი

1 აპრილი – ბერლინი თბილის

1 აპრილი – რომი თბილისი

2 აპრილი – ბარსელონა თბილისი 1000 ადამინის ჩამოყვანს უფასოდ შევძლებთ.

საქმეების 2/3 გაკეთებულია უკვე, ანუ მოძიებულია უკრაინული კომპანია, რომელიც განახორციელებს ფრენებს უფასო ჩარტერული რეისებით და მოძიებულია სახსრები, რომლებიც ამ სამაშველო ოპერაციას დასჭირდება. ეს ყველაფერი კიევში სააკაშვილმა გააკეთა, მაგრამ ეს 2/3 საქმის საკმარისი არ არის. ხელისუფლების დახმარებისა და ჩარევის გარეშე ჩვენ ამ სამაშველო ოპერაციას ბოლომდე ვერ მივიყვანთ. იმაზე არ ვლაპარაკობ, რომ საჭიროა კორიდორი, საჭიროა ფრენის ნებართვა და ა.შ, ამას ჩვენი ავიაციის დეპარტამენტი ადვილად გააკეთებს.

სჭიროა ძალიან სწრაფად საელჩოების და საკონსულოების მობილიზება იმისათვის, რომ ადგილსამყოფელი სახელმწიფოების ხელისუფლებასთან შედგეს მოლაპარაკება, მიიღონ ამ ფრენების განხორციელების ნებართვა, სასწრაფოდ დაელაპარაკონ იმაზე, რომ იყოს საბაჟო და სასაზღვრო მომსახურეობა, დაელაპარაკონ იმაზე, რომ ჩატარდეს სამედიცინო კონტროლი და შედგეს სიები. რა თქმა უნდა, უპირველეს ყოვლისა, უნდა გამოვიყვანოთ ბავშვიანი ოჯახები, ახალგაზრდები და ის ადამიანები ვინც ყველაზე მძიმე მდგომარეობაში იმყოფებიან.

ჩვენ მივიღეთ რამდენიმე ზარი, სადაც სასტუმროს მეპატრონეები უფასოდ გვთავაზობენ თავის სასტუმროებს იმისათვის, რომ უფასო ჩარტერული რეისით დაბრუნებული საქართველოს მოქალაქეები განთავსდნენ ამ სასტუმროებში და გაიარონ კარანტინი.

ამ გზაგასაყარიდან ორი გზაა: ან ეხლა ჩვენ სწრაფად ვაკეთებთ საკოორდინაციო ჯგუფს, ვამტკიცებთ, რომ ვართ ის საზოგადოება და ერი, რომელიც იმსახურებს სახელმწიფოს, დამოუკიდებლობას, სუვერენიტეტს და იმ 30 წელს, რომელიც დამოუკიდებლობის დღიდან გავიდა უბრალოდ არ ჩაუვლია, ან კიდევ ამ ხანძრის დროს ჩავიკეტებით პარტიულ ბინებში, არ დაველაპარაკებით ერთმანეთს და მივალთ იმ წერტილამდე, როდესაც თავზე დაგვემხობა სახურავი ყველას პარტიული კუთვნილების მიუხედავად“,-აცხადებს გრიგოლ ვაშაძე.

საქართველოს მესამე პრეზიდენტმა, მიხეილ სააკაშვილმა, გუშინ, მთავრობას, უცხოეთში მყოფი მოქალაქეების ჩამოსაყვანად დახმარება შესთავაზა.

აღნიშნულ განცხადებებს, საქართველოს პრემიერ-მინისტრი, გიორგი გახარია გამოეხმაურა. მისი თქმით, ქვეყანას, მოქალაქეების სამშობლოში დასაბრუნებლად არავის დახმარება არ სჭირდება.

პრემიერმა ჟურნალისტებთან ოპოზიციის შეთავაზებებზეც ისაუბრა. მისი თქმით, საკითხთან დაკავშირბეით ისეთი ადამიანები სპეკულირებენ, რომლებსაც საერთოდ მედიცინასთან ახლოსაც არ გაუვლიათ.