“ალიას” კითხვას: დატოვებს თუ არა გამყრელიძე თანამდებობას იმ შემთხვევაში, თუ მისი პროგნოზები კორონავირუსთან დაკავშირებით არ გამართლდება – დაავადებათა კონტროლის ეროვნული ცენტრის დირექტორი ამირან გამყრელიძე, პასუხობს, რომ იმ შემთხვევაში თუ პროგნოზები არ გამართლდება, ის თანამდებობას დატოვებს.
„ღმერთმა ქნას, რომ ჩემი პროგნოზი, რასაც ვამბობ, თუ ცუდი განვითარება იქნა ამ სიტუაციის და ეპიდემიის – არ გამართლდეს. ორი ხელით გეუბნებით, ნეტავ, არ გამართლდეს. მაშინ ვაძლევ „ალიას“ პირობას, რომ პირველი მოგცემთ ინტერვიუს და მეორე – წავალ ამ თანამდებობიდან.“ – განაცხადა გამყრელიძემ.
შეგახსენებთ, გამყრელიძემ ამასწინათ განაცხადა, რომ „თუ ამ ტემპით წავალთ, როგორც დღეს არის, ე.წ. მოჭერის ღონისძიებებით – მაისის 10-სთვის შეიძლება გვქონდეს 2000-2500 დადასტურებული შემთხვევა”. მისი თქმით, თუ მოვეშვებით, შეიძლება ავიჭრათ 5-7 ან 8 ათას ინფიცირებულამდე.
შეგახსენებთ, რომ 16 აპრილის მონაცემებით, საქართველოში COVID-19 ის 348 შემთხვევაა დადასტურებული. 3 უცხოეთიდან სამკურნალოდ გადმოყვანილი საქართველოს მოქალაქე. 76 პაციენტი ვირუსისგან სრულად განიკურნა. ქვეყნის მასშტაბით გარდაცვალების სამი შემთხვევა ფიქსირდება. კარანტინის რეჟიმში იმყოფება 5000 მოქალაქე, ხოლო სტაციონარში მეთვალყურეობის ქვეშ – 494.
30 მარტს საგანგებოდ გამართულ ბრიფინგზე, პრემიერ-მინისტრმა გიორგი გახარიამ განცხადება გააკეთა. მისი თქმით, კორონავირუსით ინფიცირების ზრდის დინამიკა შემაშფოთებელია.
მთავრობის მეთაურმა ადმინისტრაციაში გამართულ ბრიფინგზე, ასევე, ის შეზღუდვები ჩამოთვალა, რომლებიც, საყოველთაო კარანტინის ფარგლებში ამოქმედდება.
საქართველოში 30 მარტს, მთელი ქვეყნის მასშტაბით საყოველთაო კარანტინი და ე.წ. კომენდანტის საათი გამოცხადდა.
პრემიერ-მინისტრის განცხადებით, შეიქმნება მთავრობის ცხელი ხაზი – 144, რომელიც იქნება უფასო და მოქალაქეებს ნებისმიერ საკითხზე კოორდინაციას გაუწევს.
კარანტინისა და თვითიზოლაციის წესის დარღვევის განმეორებით შემთხვევაში, დამრღვევ პირს სასჯელის ზომად განესაზღვრება შინაპატიმრობა ან თავისუფლების აღკვეთა ერთი წლის ვადით.
მსოფლიოს მასშტაბით კორონავირუსით ინფიცირებულთა რაოდენობამ 2,115,956 მიაღწია. გარდაიცვალა 141,820 ადამიანი, გამოჯანმრთელდა 527,475 პაციენტი.
ჯანდაცვის მსოფლიო ორგანიზაციამ, 11 მარტს COVID-19, რომელმაც გავრცელება სულ რაღაც 3 თვის წინ დაიწყო, ოფიციალურად საერთაშორისო პანდემიად გამოაცხადა.
გლობალურად ახალი კორონავირუსის გავრცელების გამო პოლიტიკოსები და მათი ოჯახის წევრებიც დაზარალდნენ. „სიენენი“ კორონავირუსით დაავადებული, ასევე თვითიზოლაციაში მყოფი მსოფლიო ლიდერებისა და პოლიტიკოსების შესახებ წერს.
ისრაელის ფსიქოსომატიკის ინსტიტუტის ხელმძღვანელი, ვიდეორჩევებს იძლევა, თუ როგორ უნდა ვუმკურნალოთ კორონავირუსით ინფიცირებულს.
ინფორმაცია საქართველოში ახალი კორონავირუსის შესახებ ყოველდღიურად ახლდება საიტზე https://stopcov.ge/.
ინფორმაცია მსოფლიოში ვირუსით ინფიცირებულთა, გამოჯანმრთელებულთა და გარდაცვლილთა შესახებ ყოვედღიურად ახლდება საიტზე https://www.worldometers.info/coronavirus/.
ჯანდაცვის სამინისტროს ცხელი ხაზი: 1505.
დაავადებათა კონტროლის ცხელი ხაზი: 116 001.