“გუშინდელი მოვლენები პეტროპავლივსკა-ბორშჩაჰივკაში გარე გავლენის გარეშე არ მომხდარა – მონაწილეები და ინიციატორები გამოვლინდებიან და დაისჯებიან”- კირილ ბუდანოვი 

უკვე სარწმუნოდ არის ცნობილი, რომ გუშინდელი მოვლენები პეტროპავლივსკა-ბორშჩაჰივკაში გარე გავლენის გარეშე არ მომხდარა, – ამის შესახებ უკრაინის პრეზიდენტის ადმინისტრაციის ხელმძღვანელი, კირილ ბუდანოვი სოციალურ ქსელში წერს.

მისი თქმით, ამ მოვლენების კონკრეტული მონაწილეები და ინიციატორები გამოვლინდებიან და დაისჯებიან.

„ამ მოვლენების კონკრეტული მონაწილეები და ინიციატორები, უთუოდ, გამოვლინდებიან და დაისჯებიან; ასევე, შესაბამისი დასკვნები გაკეთდება სამართალდამცავ სტრუქტურებშიც. გენერალურმა პროკურატურამ და შესაბამისმა უწყებებმა უკვე დაიწყეს ობიექტური გამოძიება“, – აცხადებს ბუდანოვი.

ცნობისთვის, 2 ნოემბერს კიევის ოლქის პოლიციამ განაცხადა, რომ სოფელ პეტროპავლივსკა-ბორშჩაჰივკაში, კერძო სახლთან, სადაც უკრაინის ეროვნული გვარდიის ერთ-ერთი ქვედანაყოფის სამხედრო მოსამსახურეები იმყოფებიან, არეულობა მოხდა. ადგილზე ეროვნული გვარდიის მეთაური ალექსანდრ პივნენკო და ეროვნული პოლიციის ხელმძღვანელობა მივიდნენ. სამხედრო ომბუდსმენმა ოლჰა რეშეტილოვამ განაცხადა, რომ ყველა გარემოების გასარკვევად გამოძიება დაიწყო. უკრაინის ეროვნული გვარდიის „აზოვის“ ქვედანაყოფის პირველმა კორპუსმა განაცხადა, რომ დისლოკაციის პუნქტში მობილიზებულები და ის სამხედრო მოსამსახურეები იმყოფებოდნენ, რომლებიც დაკავებულები იყვნენ სამხედრო ნაწილის თვითნებურად მიტოვების შემდეგ, სამხედრო ნაწილებში განაწილებისა და სამსახურის გაგრძელების მოლოდინში. შეკრებილმა ადამიანებმა ეროვნული გვარდიის ავტობუსი დააზიანეს.

გამოძიების სახელმწიფო ბიურომ სისხლის სამართლის საქმე აღძრა.

უმაღლესი რადას ადამიანის უფლებათა კომისარი დმიტრო ლუბინეცი და სამხედრო ომბუდსმენის ოფისი მოითხოვენ არსებული ვითარების გამოძიებას და კონფლიქტის ორივე მხრიდან ყველა დამრღვევის პასუხისგებაში მიცემას.