სად არის ბიძინა ივანიშვილი? “ქართული ოცნების” საპატიო თავმჯდომარე პოლიტიკიდან ისევ გაქრა. მაშინ, როცა ქვეყანა რუსული კანონის მიღების გამო დიდ საერთაშორისო სკანდალშია გახვეული, როცა ოცნების ხელისუფლებას ყოველ ნაბიჯზე კრიტიკის ხმები ესმის და სანქციები ხელისუფლებას ისე მოუახლოვდა, როგორც არასდროს, ივანიშვილი დუმს.
ჟურნალისტები დღეს ცდილობდნენ, ქართული ოცნების დამფუძნებლის გაუჩინარების მიზეზები “ოცნების” ლიდერებისგან გამოერკვიათ, თუმცა ექვსჯერ დასმული კითხვის საპასუხოდ, ირაკლი კობახიძისგან ოლიმპიური დუმილი მივიღეთ.
“ქართული ოცნების” წევრი, პარლამენტის ვიცე-სპიკერი გია ვოლსკი ამტკიცებს, რომ ივანიშვილი პარტიის ბოლოშეკრებისას დისკუსიაში დისტანციურად ჩაერთო, თუმცა, ფოტოებში, რომელიც პარტიიდან ვრცელდება პარტიის საპატიო თავმჯდომარე არსად ჩანს.
რაც შეეხება ოპოზიციის შეფასებას, ისინი დარწმუნებულები არიან, რომ ბიძინა ივანიშვილი პოლიტიკურ პასუხისმგებლობას ვერ გაექცევა.