უკრაინაში, ოკუპირებულ დონბასში, 2 უკრაინელი სამხედრო დაიჭრა, – აღნიშნულის შესახებ ინფორმაციას უკრაინული მედია ავრცელებს.
მედია იუწყება, რომ 14 თებერვალს რუსმა ოკუპანტება ცეცხლის შეწყვეტის შეთანხმება მინიმუმ 5-ჯერ დააღვიეს.
“რუსი ოკუპანტების მოქმედების შედეგად დაშავდა გაერთიანებული ძალების ორი სამხედრო მოსამსახურე. ჯარისკაცები სამედიცინო დაწესებულებაში იმყოფებიან. ერთი სამხედროს ჯანმრთელობის მდგომარეობა საშუალო სიმძიმისაა, მეორის – დამაკმაყოფილებელია”, – ნათქვამია ანგარიშში.
ცნობილი ხდება, რომ ტრეხიზბენკადან არც თუ ისე შორს მტერმა ცეცხლი გახსნა ხელის ტანკსაწინააღმდეგო ყუმბარმტყორცნიდან.
ასევე, ნოვოტროიცკის მიმართულებით – დაზგური ტანკსაწინააღმდეგო ყუმბარმტყორცნიდან, ხოლო პესკის გარეუბანში – ხელის ტანკსაწინააღმდეგო ყუმბარმტყორცნებიდან, მძიმე ტყვიამფრქვევებიდან და მცირე იარაღიდან. მარინკას მახლობლად ოკუპანტებმა უპილოტო საფრენი აპარატი განალაგეს.
„დღევანდელი დილის 7 საათისთვის, რუსეთის საოკუპაციო ჯარების მხრიდან ცეცხლის შეწყვეტის რეჟიმის დარღვევა არ დაფიქსირებულა“, – აღნიშნეს შტაბში.
შეგახსენებთ, რომ რუსული სამხედრო ძალები უკრაინის საზღვრებთან თავდასხმის პოზიციაში გადავიდნენ.
ცნობისთვის, რუსეთ-უკრაინის საზღვარზე ვითარება დაძაბულია. როგორც უკრაინის პრეზიდენტი, ვლადიმერ ზელენსკი აცხადებს მოსალოდნელი საფრთხის წინაშე მაქსიმალურად მობილიზებულები არიან და პანიკა აბსოლუტურად არ იგრძნობა.
უკრაინის პრეზიდენტი მოსახლეობას სიმშვიდის შენარჩუნებისკენ მოუწოდებს.