„მეტრონომის“ ექსკლუზიური ინტერვიუ „ნაცმოძრაობის“ ყოფილ წევრ ანდრო ბარნოვთან
მას შემდეგ რაც ცნობილი გახდა, რომ „ნაციონალური მოძრაობა“ საპარლამენტო არჩევნებში დამარცხდა და მისი პოლიტიკური მონაგარი მხოლოდ 27 მანდატს შეადგენდა, პარტიის შიგნით დისკუსია დაიწყო. პარტიის დამფუძნებელი მიხეილ სააკაშვილი, რომელიც საარჩევნო კამპანიას უკრაინიდან აკვირდებოდა, მიიჩნევდა, რომ მე-9 მოწვევის პარლამენტი „ნაციონალური მოძრაობის“ გარეშე უნდა ყოფილიყო.
სააკაშვილის ამ პოზიციას პარტიის შიგნით გიგა ბოკერია დაუპირისპირდა და მალე შიდაპარტიული დისკუსი ღია დაპირისპირებაში გადაიზარდა. პოლიტსაბჭოს გადაწყვეტილებით „ნაციონალური მოძრაობა“ 500 ათასი ამომრჩევლის „პატივისცემის ნიშნად“ მე-9 მოწვევის პარლამენტში შევიდა.
პარტიაში მიმდინარე დაპირისპირებაზე „მეტრონომი“ „ნაციონალური მოძრაობის“ ყოფილ წევრ ანდრო ბარნოვს ესაუბრა.
„მეტრონომი“: პირველ რიგში თქვენი პოზიცია მაინტერესებს. თქვენც მიგაჩნდათ, რომ „ნაციონალური მოძრაობა“ პარლამენტში უნდა შესულიყო?
ანდრო ბარნოვი: როდესაც საუბარია იმაზე, რომ არჩევნები ტოტალურად გაყალბდა პარლამენტში შესვლა ნიშნავს იმას, რომ ეთანხმები ამას და პრობლემა არ გაქვს. ცხადია, მე ამას არ ვეთანხმებოდი. მაგრამ მანამდე კიდევ ვისურვებდი იმასაც, რომ მათ ადგილზე ემუშავათ და არჩევნების გაყალბების მტკიცებულებები მოეპოვებინათ. მათ უნდა ეჩვენებინათ, რა მასშტაბით გაყალბდა არჩევნები, თუმცა ამისთვის თითი არ გაანძრიეს.
– ანუ ფიქრობთ, რომ 2016 წლის საპარლამენტო არჩევნებში „ნაცმოძრაობა“ კი არ დამარცხდა, არამედ გაუყალბეს შედეგები და ამ არჩევნების ლეგიტიმურობა პარტიამ პარლამენტში შესვლით აღიარა…
– ცხადია.
-ცოტა ხნის წინ სერგი კაპანაძის გაკეთებულმა განცხადებამ საზოგადოებაში აზრთა სხვადასხვაობა გამოიწვია. კაპანაძე ამბობს, რომ დავით ბაქრაძე უფრო დიდი მხარდაჭერით სარგებლობდა, ვიდრე სააკაშვილი. ეთანხმებით ამ ნარატივს?
– არა. ეს ძალიან სამწუხარო განცხადებაა სერგის მხრიდან. ვისურვებდი მას ასეთი განცხადება არ გაეკეთებინა.
– მიგაჩნიათ, რომ კაპანაძის ეს განცხადება ახლანდელი ვითარებით არის განპირობებული, როცა პარტიის წევრებს სააკაშვილისგან დისტანცირება სურთ, თუ კაპანაძე შესაძლოა მართლაც ასე ფიქრობდეს?
– ეს არის ჩვეულებრივი კონიუნქტურული განცხადება და სინამდვილესთან საერთო არ აქვს.
– თქვენი შეფასებით რატომ მიიჩნევს ბოკერიას ფრთა, რომ პარლამენტში შესვლა აუცილებელია. არსებობს ღიად გაკეთებული განცხადებების გარდა სხვა მიზეზიც?
– ბოკერია თავიდანვე შესვლას არ მოითხოვდა. გახსოვთ ალბათ, ცესკოს შენობასთან რა განცხადებები გააკეთეს. მათი პოზიცია ერთ ღამეში შეიცვალა. რაც შეეხება იმას, რატომ შევიდნენ ისინი პარლამენტში, ამის შესახებ ყველა არგუმენტი ნათქვამია და ახალს ვერაფერს დავამატებ.
-აღიარებ თუ არა არჩევნების შედეგებს, ენმ-მ ოფიციალური მონაცემებით, ნახევარი მილიონი ადამიანის მხარდაჭერა მიიღო. თქვენი აზრით, თუ „ნაციონალური მოძრაობა“ სააკაშვილისგან დისტანცირდება, ამ ელექტორატს პარტია დაკარგავს?
– ეს ელექტორატი არ დაიკარგება. ეს ელექტორატი დაჰყვება ნამდვილ ლიდერებს და არა იმ ხალხს, რომლებიც მანიპულაციით ცდილობენ ხმების მოპოვებას. ცხადია ელექტორატი არ დაიკარგება. ამის გამო მათ ოცნება არ შეუყვარდებათ.
– თქვენ მიგაჩნიათ, რომ ეს ადამიანები ნაციონალური მოძრაობის“ სტაბილური ამომრჩეველია და მათთვის არ აქვს მნიშვნელობა ვინ იქნება პარტიის სათავეში?
– არა მასე არ ვფიქრობ. 500 ათასი სტაბილური მომხრე შეუძლებელია, რომ რომელიმე პარტიას ჰყავდეს. ეს აბსოლუტურად შეუძლებელია.
– თუმცა, თქვით, რომ ამ ხალხს „ქართული ოცნება“ უცებ არ შეუყვარდება..
– მე ვთქვი რომ ეს ადამიანები რეალურ ლიდერებს დაჰყვებიან. რაღაც ნომენკლატურ და დახატულ ლიდერებს ეს ხალხი არ გაჰყვება.
– არსებობს მოსაზრება, რომ გიგა ბოკერიას ფრთამ შესაძლოა მხარდამჭერთა სხვა კეტეგორია შესძინოს „ნაციონალურ მოძრაობას. იმ ადამიანებს ვგულისხმობ, რომელთაც მიშა არ მოსწონთ და მას ხმას არ აძლევენ, თუმცა ხელისუფლების მიმართაც ანტაგონისტურად არიან განწყობილნი. იზიარებთ ამ მოსაზრებას?
– ცოტა სასაცილოა ვთქვა, რომ ადამიანს რომელსაც მიშა არ მოსწონდა და მოსწონს ბოკერია.
– ამ ელექტორატში არასამთავრობო ორგანიზაციის წევრები და სამოქალაქო აქტივისტები მოაზრებიან…
– რამდენ ადამიანზე ვლაპარაკობთ საბოლოო ჯამში 50 კაცზე? 100 კაცზე? ეს არანაირი ელექტორატი არ არის. ეს არის ჯგუფი, რომელიც ამ სკამების ამარა დარჩება. სწორედ ამისთვის დაიხოცეს თავები. ანუ საპარლამენტო სკამების ამარა. პარლამენტში „რესპუბლიკური პარტიაც“ შესულა არაერთხელ, მაგრამ მერე გამოსულა უკან. ანუ დამოუკიდებლად, სიცოცხლისუნარიანი ეს ჯგუფი ვერასოდეს ვერ იქნება. უბრალოდ იმიტომ, რომ ესენი პოლიტიკური ლიდერები არ არიან. ესენი არიან ტექნოკრატები, რომლებმაც პარტია ხელში ჩაიგდეს. ყოველ შემთხვევაში ამას ცდილობენ.
– რავიცი, „ნაციონალური მოძრაობის“ „რესპუბლიკურ პარტიასთან“ შედარება რამდენად რელევანტურია?
– აბსოლუტურად რელევანტურია. იქაც არ არიან ლიდერები. არიან ადამიანები, რომლებსაც წიგნი აქვთ წაკითხული და ლაპარაკი შეუძლიათ, მაგრამ ისინი არანაირ პოლიტიკურ ენერგიას არ ასხივებენ. იგივე მოხდება აქაც. პარლამენტის სხდომის პირველ დღეს ვინც თვალი ადევნა, ალბათ ნახეთ, რომ დაანონსებული ჯოჯოხეთის ნაცვლად, ეს ხალხი რაღაცას ლუღლუღებდა. პასუხებს ვერ სცემდნენ.
– პოლიტიკურ ენერგიას მხოლოდ ქუჩაში დგომით ასხივებენ?
– ეგ მე არ მითქვამს.
– პარლამენტში არშესვლის ალტერნატივა ქუჩის გარდა რა იყო?
– როგორ შეიძლება მიიღო გაყალბებული შედეგები? შედეგი უნდა გაეპროტესტებინათ. რანაირად შეიძლება, როცა დემოკრატი ძალა ხარ და იძახი, რომ არჩევნები გაგიყალბეს, მაგრამ არაუშავს. რას მეკითხებით საერთოდ, ვერ გავიგე.
– რას და… საპარლამენტო პარტიას უფრო მეტი ბერკეტი აქვს, მათთან შედარებით ვინც პარლამენტში ვერ ხვდება.
– რისი ბერკეტი? წარმოიდგინეთ, რომ უსამართლოდ დაგაკაონ, რა გზა გრჩებათ? ერთი იჩივლო და მიმართო საერთაშორისო ორგანიზაციებს და სასამართლოს და მეორე, როცა ამბობ სასამართლო დარბაზში რაღაცას ვიტყვი და თუ გამივა და თუ არა, რა გავაკეთოო. ასეთი სიტუაცია გვაქვს.
– შეგვიძლია დღეს ვთქვათ, რომ სააკაშვილი მთლიანად ჩამოსცილდა პარტიას და ენმ რეალურად ცალკე ძალაა?
– არა. არანაირად. პირიქით, სულაც არ არის ჩამოშორებული. სინამდვილეში „ნაციონალურ მოძრაობას“ ჩამოშორდა ის გუნდი, რომელიც პარლამენტში შევიდა. პარტიას ესენი უფრო ჩამოშორდნენ ვიდრე სააკაშვილი.
– ფაქტია, მისი პოზიცია პარტიამ არ გაიზიარა. ამის შედეგ ჩნდება კითხვა კიდევ არის სააკაშვილი პარტიის ლიდერი?
– თქვენ პარტიას ეძახით ამ 27 კაცს და არ არის ეს პარტია. ეს არის ერთი ჯგუფი.
– პარლამენტში შესვლის გადაწყვეტილება პარტიის პოლიტსაბჭომ მიიღო…
– დიახ. პარლამენტში ამ ჯგუფის გადაწყვეტილებით შევიდნენ.
მარიამ ვარადაშვილი