მაკა ბოჭორიშვილმა და „ქართული ოცნების“ თითოეულმა წევრმა ძალიან კარგად იციან, რომ ისინი ვერ გაექცევიან პერსონალურ პასუხისმგებლობას, რომელსაც ისტორია და ქართველი ხალხი მათ დააკისრებს ქვეყნის ევროპული მომავლის მოსპობის გამო, – ამის შესახებ პარტია „გახარია-საქართველოსთვის“ განცხადებაშია აღნიშნული, რითაც მაკა ბოჭორიშვილის განცხადებას ეხმაურება.
როგორც პარტია აღნიშნავს, საქართველოში ყველამ იცის, რომ ირაკლი კობახიძემ განაცხადა საქართველოს ევროინტეგრაციის ცალმხრივად შეჩერებაზე, რითაც გამოუსწორებელი ზიანი მიაყენა საქართველოს ევროპულ პერსპექტივას.
„გუშინ საგარეო საქმეთა მინისტრმა, მაკა ბოჭორიშვილმა პარლამენტის ტრიბუნიდან დაადასტურა ქვეყნის ევროპული კურსის ცვლილება და ტყუილებითა და დეზინფორმაციით ევროინტეგრაციის პროცესის შეჩერება ევროკავშირს დააბრალა. საქართველოში ყველამ იცის, რომ 2024 წლის 28 ნოემბერს, ირაკლი კობახიძემ განაცხადა „ოცნების“ გადაწყვეტილება, საქართველოს ევროინტეგრაციის ცალმხრივად შეჩერებაზე, რითაც გამოუსწორებელი ზიანი მიაყენა საქართველოს პერსპექტივას, გახდეს მშვიდობასა და კეთილდღეობაზე დაფუძნებული ევროპული ოჯახის სრულფასოვანი წევრი. მაკა ბოჭორიშვილმა და „ქართული ოცნების“ თითოეულმა წევრმა ძალიან კარგად იციან, რომ ისინი ვერ გაექცევიან პერსონალურ პასუხისმგებლობას, რომელსაც ისტორია და ქართველი ხალხი მათ დააკისრებს ქვეყნის ევროპული მომავლის მოსპობის გამო“, – აღნიშნულია განცხადებაში.
ცნობისთვის, მაკა ბოჭორიშვილმა განაცხადა, რომ „ქართული ოცნებას“ ევროინტეგრაციის პროცესი არ შეუჩერებია.
„ქართულ ოცნებას“ ევროინტეგრაციის პროცესი არასდროს შეუჩერებია, პირიქით, „ქართული ოცნების“ ხელისუფლების თანმიმდევრული პოლიტიკის შედეგად თამამად შეგვიძლია ვთქვათ, რომ დღეს საქართველო სხვადასხვა მიმართულებით ბევრად უფრო ახლოს არის ევროპულ სტანდარტებთან, ვიდრე სხვა კანდიდატი ქვეყნები“, – განაცხადა ბოჭორიშვილმა.