რუსებმა კუნძულ “ზმეინზე” შეტევის განხორციელება და იქ უკრაინული დროშის აღმართვისთვის ხელის შეშლა სცადეს. ამის შესახებ უკრაინის სამხრეთ უკრაინის თავდაცვის ძალების გაერთიანებული საკოორდინაციო პრეს-ცენტრის ხელმძღვანელმა, ნატალია გუმენიუკმა ნაციონალური ტელემარათონის ეთერში განაცხადა.
“დროშა კუნძულზეა. ამასთან დაკავშირებულმა ინფორმაციამ, რა თქმა უნდა, დააბნია ჩვენი მტრები”, – ამბობს გუმენიუკი.
მისი თქმით, რუსებმა კუნძულზე საჰაერო დაზვერვა განახორციელეს და უკრაინელებისთვის დარტყმის მიყენება სცადეს.
“ისინი ცდილობდნენ დარტყმის განხორციელებას, მაგრამ ნახეს, რომ საფრთხე ემუქრებოდათ და ამ დროისთვის, თავი შორს უჭირავთ”, – ამბობს ის.
შეგახსენებთ, 30 ივნისს გავრცელდა ინფორმაცია, რომ კუნძული “ზმეინი” რუსი ოკუპანტებისგან გათავისუფლდა. მალევე, უკრაინის შეიარაღებული ძალების მთავარსარდალმა ვალერი ზალუჟნიმ გამოაქვეყნა ვიდეო, რომელშიც ჩანს, როგორ გაიქცნენ ოკუპანტები კუნძულიდან.
ამავე თემაზე: უკრაინელებმა კუნძულ “ზმეინზე” დროშა აღმართეს
ამავე თემაზე: უკრაინელებმა კუნძულ “ზმეინზე” რუსების დატოვებული ტექნიკა და შეიარაღება გაანადგურეს