ოკუპანტები უკრაინის აღმოსავლეთზე თავდასხმისთვის ემზადებიან, – აღნიშნულის შესახებ ინფორმაციას უკრაინული მედია ქვეყნის გენერალურ შტაბზე დაყრდნობით ავრცელებს.
მისივე ცნობით, ოკუპანტები ძალების კონცენტრაციას და გადაჯგუფებას სწორედ უკრაინის ამ ნაწილში ახდენენ.
“მიზანია დონეცკისა და ლუგანსკის რეგიონების ტერიტორიაზე სრული კონტროლის დამყარება. მტერი ცდილობს გააუმჯობესოს ქვედანაყოფების პოზიციები ტაურიდისა და იუჟნობუგსკის ოპერაციულ რაიონებში”, – ნათქვამია ინფორმაციაში.
ასევე აღნიშნულია, რომ პოლესიიდან და სივერშჩინადან გაყვანილი ქვედანაყოფების გადაადგილება ახალ საოპერაციო რაიონებში გრძელდება. უკრაინის ტერიტორიიდან ცენტრალური სამხედრო ოლქის ჯარების გადანაწილება დასრულდა.
განსაზღვრული ქვედანაყოფები, საბრძოლო შესაძლებლობების აღდგენის დასრულების შემდეგ, გადაინაცვლებენ ვალუიკის დასახლების რაიონში და შედიან ჯარების შეტევითი დაჯგუფებების შემადგენლობაში.
გარდა ამისა, აღინიშნება იარაღისა და სამხედრო ტექნიკის კოლონების მოძრაობა ბელორუსის ტერიტორიაზე გომელის, ელსკის და მოზირის სარკინიგზო სადგურების მიმართულებით სარკინიგზო ეშელონებზე ჩასატვირთად.
„რუსეთის ფედერაციის შეიარაღებული ძალების საჰაერო ძალების თვითმფრინავებისა და შვეულმფრენების მნიშვნელოვანი ნაწილი გადატანილია ბელორუსის რესპუბლიკის აეროდრომებიდან რუსეთის ტერიტორიაზე“, – ნათქვამია ტექსტში.