დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, საქართველოს მთავრობა რამდენიმე ქვეყანასთან მუშაობს, რომ მოქალაქეებისთვის ვაქცინაცია რაც შეიძლება მალე გახდეს ხელმისაწვდომი.
როგორც გამყრელიძე აცხადებს, ქვეყანა თავდაპირველად ვაქცინას მოსახლეობის 20%-სთვი, ანუ 700 000 ადამიანისთვის საკმარის რაოდენობას შეიძენს, რაც 17 მლნ დოლარამდე ჯდება.
ამასთან, გამყრელიძის თქმით, ვაქცინაცია სამედიცინო მუშაკებით დაიწყება, შემდეგ კი მეორე რისკ-ჯგუფის ადამიანების აცრა მოხდება, რომელშიც თანმხლები დაავადებების მქონე პირები შედიან.
“ყველაზე მაღალ რის-ჯგუფს წარმოადგენენ ჩემი კოლეგები… ყველგან, იგივე აშშ-შიც ვაქცინაცია სამედიცინო პერსონალიდან იწყება; მეორე რისკ-ჯგუფი იქნება ხანდაზმულები და სადაც არის სხვა თანმხლები დაავადებები, როგორიც არის ფილტვის ქრონიკული დაავადებები, დიაბეტი, გულ-სისხლძარღვთა ავადმყოფობები; მხოლოდ ამის შემდეგ ვაქცინაცია მოხუცთა სახლების, თავშესაფრებში და ა.შ. მოხდება“, – განაცხადა ამირან გამყრელიძემ.
ამასთან, დაავადებათა კონტროლის ეროვნული ცენტრის ხელმძღვანელის განმარტებით, მოსახლეობისთვის COVID-19-ზე ვაქცინაცია უფასო იქნება.
ამასთან, გამყრელიძის თქმით, საქართველო COVID-19-ის საწინააღმდეგოდ იმ ვაქცინას გამოიყენებს, რომელსაც ჯანმრთელობის მსოფლიო ორგანიზაცია დაამტკიცებს.