კოალიცია “ქართული ოცნების“ ლიდერი ირაკლი ღარიბაშვილი, გოგი თოფაძის მოსაზრებებს “რუსთავი2”-თან და სტალინთან დაკავშირებით, ემიჯნება. განცხადებას “მეტრონომი”უცვლელად გთავაზობთ;
“ჩვენ კატეგორიულად ვემიჯნებით პარლამენტის წევრის, ბატონ გოგი თოფაძის პირად მოსაზრებებს ტელეკომპანია „რუსთავი-2-თან“ დაკავშირებით. ასევე, ვემიჯნებით დეპუტატის პოზიციას სტალინთან დაკავშირებით. კოალიციას აქვს მტკიცე პოზიციები ასეთ ფუნდამენტურ თემებთან მიმართებით და ჩვენ ეს პოზიციები საჯაროდ გვაქვს გაცხადებული. ჩვენთვის უმნიშვნელოვანესია მედიის თავისუფლება და მიგვაჩნია, რომ „რუსთავი-2-თან“ დაკავშირებით ობიექტური, მიუკერძოებელი განაჩენი დამოუკიდებელმა სასამართლომ უნდა გამოიტანოს. ჩვენ ვართ ევროპული ღირებულებების ერთგული პოლიტიკური კოალიცია, რომელსაც კარგად აქვს გააზრებული საბჭოთა წარსული. ჩვენ დარწმუნებული ვართ,რომ ევროპული და ევროატლანტიკური კურსი არის სწორი გზა და იგი პრინციპულად განსხვავდება იმ რეჟიმისგან, რომელშიც ათეული წლების განმავლობაში მოგვიწია ცხოვრება. ჩვენ მივისწრაფვით დემოკრატიული განვითარებისკენ, ევროპული ოჯახისკენ”- ნათქვამია განცხადებაში.
შეგახსენებთ, გოგი თოფაძემ განაცხადა, რომ “სტალინის პორტრეტი საქართველოში, ყველა კაბინეტში დაიკიდება, იმიტომ,რომ იგი იყო მე-20 საუკუნის გენიალური პიროვნება, ხოლო რაც შეეხება “რუსთავი 2”- ს თოფაძემ “რუსთავი2”-ის მიკროფონი ხელში აიღო, ცალკე გადადო და განაცხადა, რომ “რუსთავი 2” ხვალ აღარ იქნება.