მესტიის მუნიციპალიტეტის სოფელ ხაიშთან, ტყის მასივში გაჩენილი ხანძრის ქრობის სამუშაოები უწყვეტ რეჟიმში მიმდინარეობს – ინფორმაციას საგანგებო სიტუაციების მართვის სამსახური ავრცელებს.
უწყების ინფორმაციით, ცეცხლის ქრობას ძლიერი ქარი, სიცხე და რთული რელიეფი ართულებს, რის გამოც სვანეთში დამატებითი ძალების მობილიზება ხდება.
დღის მეორე ნახევარში ადგილზე გაძლიერდა ქარი, ცეცხლის ქრობის სამუშაოებს ართულებს ძლიერი სიცხე და რელიეფი. შესაბამისად, ადგილზე მიმდინარეობს დამატებითი ძალების მობილიზება. სვანეთში მიემგზავრება მეხანძრე-მაშველთა პირადი შემადგენლობა სხვადასხვა რეგიონებიდან 80 მეხანძრე-მაშველის შემადგენლობით. ასევე, ადგილზე იმუშავებს დამატებით 5 სახანძრო-სამაშველო ავტოცისტერნა და 2 – 10 ტონიანი წყალმზიდი – ნათქვამია საგანგებო სამსახურის გავრცელებულ ინფორმაციაში.
მათივე ცნობით, სამაშველო სამუშაოებში სულ 110 მეხანძრე -მაშველი და 7 სახანძრო-სამაშველო ტექნიკა ჩაერთვება. გარდა ამისა, ადგილზე იმუშავეს შსს-ს სასაზღვრო პოლიციის ვერტმფრენიც.