aviabiletebi
ახალი ამბები მთავარი პოლიტიკა

“იმედია, მთავრობა ბოროტების ჩადენას ვერ მოასწრებს” – გოცირიძე „საზოგადოებრივი ჯანმრთელობის შესახებ“ კანონზე

aviabiletebi
ავიაბილეთები

“საუკეთესო შემთხვევაში, თვე-ნახევარი ანტიკონსტიტუციური მდგომარეობის პირობებში ვიქნებით, რადგან „საზოგადოებრივი ჯანმრთელობის შესახებ“ კანონი 15 ივლისამდე მოქმედებს და იმედია, მთავრობა რაიმე ბოროტების ჩადენას ამ პერიოდში ვერ მოასწრებს”, – ამის შესახებ ჟურნალისტებს ფრაქცია „ნაციონალური მოძრაობის“ თავმჯდომარემ, რომან გოცირიძემ განუცხადა.

რომან გოცირიძის თქმით, კანონპროექტის თავდაპირველი ვერსიით სხვანაირი გეგმა იყო ჩაფიქრებული, კანონი მუდმივი უნდა ყოფილიყო და ნებისმიერი უფლება, რაც მთავრობას შეზღუდვების თვალსაზრისით საგანგებო მდგომარეობის დროს ჰქონდა, მისი გამოყენება ყოველთვის უნდა შეძლებოდა, მათ შორის, საარჩევნო კამპანიის დროს.

„დიდი ბრძოლის შედეგად მივაღწიეთ იმას, რაც დღეს არის. 15 ივლისის შემდეგ, ეს კანონი ისტორიას ჩაბარდება, მაგრამ ისტორიას შემორჩება ის, რომ დღეიდან, საქართველო არაკონსტიტუციურ უფლებებს აძლევს მთავრობას. ნებისმიერ შემთხვევაში, კანონი უნდა გასაჩივრდეს, რათა არავის ეპატიოს კონსტიტუციის დარღვევა. შეიძლება, მისი განხილვა ვერ მოესწროს და კანონი მანამდე გაუქმდეს, მაგრამ სარჩელი აუცილებელია, რადგან ხელისუფლებამ მორალური და პოლიტიკური პასუხი უნდა აგოს. საკონსტიტუციო სასამართლო დიდწილად დამოკიდებულია ხელისუფლებაზე.

მას შეუძლია, საქმე გააჭიანუროს და ფეხი აითრიოს, საქმე მანამდე არ მიიყვანოს და მთავრობა არ ჩააყენოს ცუდ მდგომარეობაში, რადგან საკონსტიტუციო სასამართლო ხელისუფლებას ხელს ყოველთვის აფარებს. ის მინიმალური შეზღუდვები, რაც უკვე მოქმედებს, რომლის შერბილებასაც აპირებენ მომავალში, შესაძლებელია, დაწესებულიყო მთავრობის მიერ ან ზოგიერთი მათგანი პარლამენტთან შეთანხმებით. ეს სავსებით შესაძლებელი იყო, სამართლებრივად ყველაფრის მოგვარება შეიძლებოდა, მაგრამ მათ ეს გზა აირჩიეს. ეტყობა, ჩანაფიქრი სულ სხვა ჰქონდათ, ეგონათ, გაუვიდოდათ და მუდმივ მოქმედ კანონს გამოიყენებდნენ, მათ შორის რეპრესიებისთვის, პოლიტიკური ოპოზიციის გასაჩერებლად, ასევე კონკურენციის შესაჩერებლად, ჭარბი ძალაუფლებისთვის, „შავი დღისთვის“. ოპოზიციის მიზანია, კონსტიტუციის დაცვა. შეუძლებელია, ამაზე მეტი მიზანი არსებობდეს“, – განაცხადა გოცირიძემ.

შეგახსენებთ, გუშინ საქართველოს პარლამენტის ჯანდაცვის კომიტეტის სხდომაზე “საზოგადოებრივი ჯანმრთელობის შესახებ“ კანონპროექტის შესწორებული ვერსია წარადგინეს, რომლითაც მთავრობას საგანგებო მდგომარეობის გამოცხადების გარეშე შეზღუდვების დაწესება შეეძლება.

იტვირთბა....