დაავადებათა კონტროლის ეროვნული ცენტრის ხელმძღვანელი, ამირან გამყრელიძე აცხადებს, რომ პრეპარატი „რემდესივირი“ კორონავირუსის ყველა შემთხვევის დროს არ გამოიყენება და არის ამერიკის წამლისა და საკვები პროდუქტების სააგენტოს რეკომენდაციები მის გამოყენებასთან დაკავშირებით.
გამყრელიძის განცხადებით, საქართველომ უკვე მიმართა წამლის მწარმოებელ „გილეადს“, რომ გათვალისწინებული იყოს ჩვენთვის წამლის მოწოდება.
„ამ წამალს აწარმოებს ჩვენი ძალიან კარგი პარტნიორი „გილეადი“, რომელიც ჩვენთან თანამშრომლობს და გვეხმარება ჰეპატიტის წინააღმდეგ წარმატებულ პროგრამაში. ეს წამალი არის 2015 ში შექმნილი, ებოლას ეპიდემიის დროს, ანტივირუსული წამალია.
ამ დღეებში, ამერიკის წამლისა და საკვები პროდუქტების სააგენტომ მისცა დასტური, რომ ის შეიძლება იყოს გამოყენებული მძიმე შემთხვევებისთვის. საქართველომ უკვე ერთი თვეა, მიმართა მაღალ დონეზე „გილეადის“ ხელმძღვანელობას, რომ გათვალისწინებული იყოს საქართველოსთვის წამლის მოწოდება.
იმედია, რომ ჩვენ გვექნება. მაგრამ ეს არ ინიშნება ყველა შემთხვევაში. მას აქვს თავისი ჩვენებები და არის ამერიკის წამლის სააგენტოს რეკომენდაციები, როდესაც უნდა დაინიშნოს“, – განაცხადა ამირან გამყრელიძემ.
შეგახსენებთ, კორონავირუსის ექსპერიმენტული წამალი, რემდესივირი, ამერიკის საკვებისა და წამლების ადმინისტრაციამ ოფიციალურად დაადასტურა ინფექციის წინააღმდეგ ეფექტურ სამკურნალო საშუალებად.