„საქართველოს ხელისუფლებამ 60 მილიონი დოლარი, ფაქტობრივად, ჰაერში გაისროლა, რადგან არც ლარის კურსს დაეტყო არაფერი და ვერც მოსახლეობის დამშვიდება შეძლეს”, – ასე აფასებს პოლიტიკური მოძრაობა „ტრიბუნას“ ლიდერი, დავით ჭიჭინაძე ქვეყანაში დღეს შექმნილ ეკონომიკურ მდგომარეობას და საქართველოს ხელისუფლებას სთავაზობს ეკონომიკის მართვის იმ მეთოდებზე გადასვლას, რომლებსაც დღეს პრაქტიკულად მთელი დასავლეთი მიმართავს.
„ეკონომიკური გუნდის განცხადებები, არა მარტო არაფრისმთქმელია, არცერთ განცხადებას არანაირი კავშირი არ აქვს იმ რეალურ სიტუაციასთან, რაც საქართველოში ვითარდება. ფაქტია, ქვეყანაში 60 მილიონი დოლარი გაიყიდა, მაგრამ აქიდან არც ლარის კურსს ეტყობა არაფერი, ვერც მოსახლეობა დამშვიდდა, რადგან დღეს საქართველოში ეკონომიკა სრულად გაჩერებულია და არაფერი არ იძლევა იმის იმედს, რომ ასეთი დარიგებული თანხები ეკონომიკისკენ იქნება მიმართული.
თუ პროცესების შეჩერება გვინდა, ამ პროცესებს უნდა დავუპირისპიროთ მხოლოდ აქტიური ეკონომიკა, რადგან პასიური ეკონომიკის პირობებში, ნებისმიერი ასეთი ნაბიჯი აბსოლუტურად უარყოფითად იქნება აღქმული ჩვენი ეკონომიკის მიერ და შედეგიც შესაბამისად მხოლოდ სპეკულაციური ექნება.
ანუ, დღეს ლარს ვერაფერით ვერ გაამყარებს ე.წ. საბაზრო ნაბიჯები. იმიტომ, რომ სადაც ლარი მიემართებოდა, დღეს ყველაფერი გაჩერებულია და ლარს არ გააჩნია ის მოტივაცია, რომ იქცეს საქონლად”, – აცხადებს დავით ჭიჭინაძე.
მისივე თქმით, იგი ხელისუფლებას მოუწოდებს, გადმოიღოს დასავლეთის მართვის მეთოდები.
“მოვუწოდებ ხელისუფლებას, გადმოვიღოთ დასავლეთის ის მართვის მეთოდები, რომელსაც მთელი დასავლეთი მიმართავს, რაც ნიშნავს იმას, რომ გადავიდეთ მართვად ეკონომიკაზე და არა თავისუფალი საბაზრო ეკონომიკის მეთოდებზე.
მოკლედ, ვალდებულებებთან მიმართებაში ქვეყანაში თუ არ გამოცხადდა ფორს მაჟორი, ჩვენ სიტუაცია ნელ-ნელა გაგვექცევა ხელიდან და ის კომპანიებიც კი, რომლებიც დღეს კიდე არიან ბაზარზე დარჩენილები, ისინიც უუნაროები გახდებიან.
ასევე მინდა გამოვეხმაურო საერთაშორისო ორგანიზაცია IATA -ს რეკომენდაციებს, გადამზიდავებთან დაკავშირებით, რომელიც მოუწოდებს ცენტრალურ აღმოსავლეთ აზიას და შესაბამისად საქართველოს, რომ სახელმწიფომ მხარი დაუჭიროს საკუთარ ავიაკომპანიებს.
მითუმეტეს, რომ ჩვენი ემიგრაციის ძალიან დიდი ნაწილი დღეს დარჩენილია ქართული ავიაკომპანიების იმედად. სახელმწიფომ კი, მაქსიმალურად უნდა შეუწყოს ხელი სწორედ ქართულ კომპანიებს, რომ მათ შეძლონ ჩვენი მოქალაქეების სახლში დაბრუნება. ამასთან, უნდა მოეწყოს უფრო მეტი საკარნტინო ზონა რომ დაბრუნება უფრო უსაფრთხო იყოს”, – აცხადებს დავით ჭიჭინაძე.