საქართველოს ახალგაზრდა იურისტთა ასოციაცია აჭარის უმაღლეს საარჩევნო კომისიას მიმართავს და საქართველოს ყოფილი პრეზიდენტის, მიხეილ სააკაშვილის წინააღმდეგ სანქციის გამოყენებისკენ მოუწოდებს.
საია-ში აცხადებენ, რომ მიხეილ სააკაშვილმა გუშინ, „ნაციონალური მოძრაობის“ მაჟორიტარობის კანდიდატების წარდგენაზე, ბათუმის მოსახლეობისადმი ვიდეომიმართვით წინასაარჩევნო აგიტაციასთან დაკავშირებული კანონმდებლობა დაარღვია. კერძოდ, „ახალგაზრდა იურისტთა ასოციაციის“ აჭარის ორგანიზაციის ხელმძღვანელის, გიორგი ხიმშიაშვილისგანმარტებით, „საარჩევნო კოდექსის“ თანახმად, უცხო ქვეყნის მოქალაქეს წინასაარჩევნო აგიტაციის გაწევის და აგიტაციაში მონაწილეობის უფლება არ აქვს. აღნიშნულის გამო საია უსკო-ს მიმართავს, სააკაშვილის წინააღმდეგ, წინასაარჩევნო აგიტაციაში უცხო ქვეყნის მოქალაქის მონაწილეობისთვის გათვალისწინებული სანქცია გამოიყენოს, რაც გულისხმობს დაჯარიმებას 2 000 ლარის ოდენობით.
„2016 წლის 31 ივლისს მოქალაქეთა პოლიტიკურმა გაერთიანებამ „ერთიანი ნაციონალური მოძრაობა“ ქ.ბათუმში, ადგილობრივ ამომრჩევლებთან გამართა საჯარო შეხვედრა, სადაც 2016 წლის 8 ოქტომბერს დანიშნულ საპარლამენტო და აჭარის ა/რ უმაღლეს საბჭოს არჩევნებში მონაწილეობის მიზნით ამომრჩევლებს წარედგინა მაჟორიტარობის კანდიდატები. ამავე შეხვედრაზე გავრცელდა საქართველოს ყოფილი პრეზიდენტის და ამჟამად უკრაინის მოქალაქის, უკრაინის ქალაქ ოდესის გუბერნატორის მიხეილ სააკაშვილის ვიდეო მიმართვა , რომელიც აშკარად შეიცავდა ერთიანი ნაციონალური მოძრაობისათვის მხარდაჭერის მოწოდებას.
მიგვაჩნია, რომ უკრაინის მოქალაქემ, უკრაინის ქალაქ ოდესის გუბერნატორმა მიხეილ სააკაშვილმა ჩაიდინა სავარაუდო წინასაარჩევნო აგიტაცია კანონის მოთხოვნათა დარღვევა. კერძოდ, საქართველოს საარჩევნო კოდექსის მე-2 მუხლის „ჰ1“ ქვ.პუნქტის თანახმად, წინასაარჩევნო აგიტაცია ეს არის ამომრჩეველთა მოწოდება საარჩევნო სუბიექტის/საარჩევნო სუბიექტობის კანდიდატის მხარდასაჭერად ან საწინააღმდეგოდ, აგრეთვე ნებისმიერი საჯარო მოქმედება, რომელიც ხელს უწყობს ან ხელს უშლის მის არჩევას, ან/და რომელიც შეიცავს წინასაარჩევნო კამპანიის ნიშნებს, მათ შორის, წინასაარჩევნო ღონისძიების ორგანიზებაში/ჩატარებაში მონაწილეობა, საარჩევნო მასალების შენახვა ან გავრცელება, მხარდამჭერთა სიებზე მუშაობა, პოლიტიკური პარტიების წარმომადგენლობებში ყოფნა.
ამავე კოდექსის 45-ე მუხლის მე-4 ნაწილის „ვ“ ქვ. პუნქტის თანახმად წინასაარჩევნო აგიტაციის გაწევის და აგიტაციაში მონაწილეობის უფლება არ აქვს უცხო ქვეყნის მოქალაქეს. “აჭარის ავტონომიური რესპუბლიკის უმაღლესი საბჭოს არჩევნების შესახებ” აჭარის ავტონომიური რესპუბლიკის კანონის 53-ე მუხლის თანახმად ამ კანონითა და საქართველოს კანონმდებლობით დადგენილი წინასაარჩევნო აგიტაციისა და კამპანიის წესების დარღვევისათვის საარჩევნო სუბიექტების მიმართ გამოიყენება საქართველოს ორგანული კანონით „საქართველოს საარჩევნო კოდექსი” დადგენილი სანქციები.
საქართველოს საარჩევნო კოდექსის 79-ე მუხლის მიხედვით ამ კანონის მოთხოვნათა დარღვევით წინასაარჩევნო აგიტაციაში მონაწილეობის მიღება გამოიწვევს დაჯარიმებას 2 000 ლარის ოდენობით.
საქართველოს საარჩევნო კოდექსის 93-ე მუხლის 1-ლი ნაწილის მიხედვით ამ კანონის 79-ე მუხლით გათვალისწინებულ ადმინისტრაციულ სამართალდარღვევის შესახებ ოქმს ადგენენ ცესკოს თავმჯდომარე, აგრეთვე ცესკოსა და შესაბამისი საოლქო საარჩევნო კომისიების მიერ უფლებამოსილი პირები (თანამდებობის პირები).
ყოველივე ზემო აღნიშნულიდან გამომდინარე გთხოვთ შეისწავლოთ განცხადებაში აღწერილი ფაქტობრივი გარემოება, დაიწყოთ ადმინისტრაციული სამართალდარღვევის ფაქტზე ადმინისტრაციული წარმოება და ადმინისტრაციული სამართალდარღვევის დადასტურების შემთხვევაში,შესაბამისი სამართალდამრღვევი პირის მიმართ განახრციელოთ საქართველოს საარჩევნო კოდექსით გათვალისწინებული ზომები“, – აღნიშნულია საია-ს აჭარის ორგანიზაციის ხელმძღვანელის გიორგი ხიმშიაშვილის განცხადებაში.
შეგახსენებთ, გუშინ, ბათუმში „ნაციონალური მოძრაობის“ საარჩევნო შეხვედრაზე, სადაც საქართველოს პარლამენტსა და აჭარის უმაღლეს საბჭში მაჟორიტარობის კანდიდატები წარადგინეს, სცენასთან დამონტაჟებული სპეციალური ეკრანიდან საქართველოს ყოფილი პრეზიდენტის მიხეილ სააკაშვილის ვიდეო მიმართვაც გავრცელდა. მიხეილ სააკაშვილმა მოსახლეობას მხარდაჭერის თხოვნით მიმართა.