საქართველოს პრეზიდენტმა გიორგი მარგველაშვილმა გერმანიის საზოგადოებრივი მაუწყებლის კითხვას: ”გასაგებია საქართველოს სწრაფვა ევროკავშირისკენ, მაგრამ რატომ ნატო – ეს განპირობებულია რუსეთის შიშით თუ სხვა მიზეზებიც არსებობს?”, შემდეგი ფორმით უპასუხა:
“მე მოხარული ვარ, რომ ის პოზიცია, რომ ქართველი ერი და ქართული საზოგადოება არის ევროპული ერი და ევროპული საზოგადოება და საქართველო არის აღმოსავლეთ ევროპის ქვეყნად მიჩნეული. მე მოხარული ვარ იმითაც, რომ ამის განცდა იმდენად გაზიარებულია, თქვენ მისვამთ ასეთ კითხვას და ბუნებრივად მიიჩნევთ, რომ ჩვენ ევროკავშირისკენ მივისწრაფვით – ეს არგუმენტები გესმით და კითხვა არის კონკრეტულად ნატო-სთან მიმართებაში. პასუხი, ჩემი აზრით, აქაც ძალიან მარტივია – ნატო არის ყველაზე სტაბილური უსაფრთხოების ფორმატი, სადაც ერთიანდებიან ჩვენი ღირებულების მსგავსი ქვეყნები. სხვა ასეთ მსგავს ფორმატს ვერავინ დამისახელებს, სადაც ერთიანდებიან ქვეყნები, ვის ღირებულებებსაც ჩვენ ვიზიარებთ, რომლებიც პოლიტიკური და სოციალური წყობითაც ჩვენი მსგავსები არიან და ამავე დროს, ისინი ყველაზე სტაბილურ უსაფრთხოების ფორმატს ქმნიან. შესაბამისად, საქართველოსთვის ნატო არის ბუნებრივი არჩევანი, ჩვენ ამ კულტურული და ცივილიზაციური გარემოს წევრები ვართ და ამ სიბრტყეში ყველაზე სტაბილურობის მომტანი არის ნატო. ბუნებრივია, რომ ისეთი მცირე ზომის ქვეყანას, როგორიცაა საქართველო და აგრეთვე ქვეყანას, რომელიც ასეთ სტრატეგიულ და რთულ რეგიონშია, აქვს მისწრაფება სტაბილურობის გარღმავებისა თავის პარტნიორებთან ერთად“, – განაცხადა საქართველოს პრეზიდენტმა.
შეგახსენებთ, რომ საქართველოს პრეზიდენტი, გიორგი მარგველაშვილი, გერმანიაში ოფიციალური ვიზიტით იმყოფება.