თავდაცვის მინისტრი თინა ხიდაშელი საპარლამენტო უმრავლესობის წევრს თამაზ მეჭიაურს მიმართავს, განმარტოს სად და როდის გახიზნა მან შვილები. აღნიშნულის შესახებ თინა ხიდაშელი „ფეისბუქის“ საკუთარ გვერდზე წერს:
„ამ ბატონისგან კატეგორიულად მოვითხოვ პასუხს, სად და როდის გავხიზნე ჩემი შვილები, ან როცა მათ საფრთხე ემუქრეოდათ ის თავად სად იყო, რომელი ჩირგვის ძირში?
ეს ყველაფერი ძალიან მახინჯ ფორმას იღებს უკვე. არავითარი ვალდებულება არ მაქვს ვიჯდე და ვისმინო აბდაუბდა. რამდენიმე წუთის წინ გავიგე ბატონ მეჭიაურს
უბრძანებია, მე ამ გადაწყვეტილების მიმღებებისგან განსხვავებით შვილები არ მყავს გახიზნული და ქვეყნის ბედი მაღელვებსო. ქვეყნის ბედზე, რუსულ არჩევანზე, შიშზე, ბაბაია დაუძახეზე სხვა დროს.
ეს ამბავი პირველი რომ იყოს გავატარებდი ალბათ მაგრამ ამ ბატონისგან კატეგორიულად მოვითხოვ პასუხს სად და როდის გავხიზნე ჩემი შვილები, ან როცა მათ საფრთხე ემუქრეოდათ ის თავად სად იყო, რომელი ჩირგვის ძირში?
მე ყველა გავაფრთხილე არავითარ კონტექსტში არასოდეს ჩემი შვილები არ ახსენოთ, პასუხს მოგთხვთ-თქო.
ხოდა პატივცეულო მედია, იქნებ გადასცეთ ჩემი კითხვა და დაჟინებით ითხოვოთ მისამართი!“ – წერს თინა ხიდაშელი.
შეგახსენებეთ, რომ თამაზ მეჭიაურმა ქართულ-ამერიკული წვრთნების შესახებ კომენტირებისას განაცხადა, რომ ახლა, წვრთნების გამართვა სწორი არ იქნებოდა. მეჭიაურის თქმით, “ის სხვებისგან განსხვავებით ამ საკითხთან მიმართებაში ფრთხილია”. მანვე აღნიშნა, რომ “სხვებისგან განსხვავებით, მას შვილები არსად გაუხიზნავს”. თუმცა, დეპუტატს არ დაუკონკრრეტებია, ვის გულისხმობდა.
“არ ვიცი უმრავლესობა ამ აზრს თუ იზიარებს, თუმცა მე ჩემი მოსაზრება მაქვს, რომ წვრთნების ჩატარება, ამ შემთხვევაში, სწორი არ არის. მე ვარ უფრო ფრთხილი, განსხვავებით ზოგიერთებისგან, მე შვილები არსად გამიხიზნავს, არც დასავლეთში და არც უფრო შორს. განსხვავებით ზოგიერთებისგან, მე საფრთხეს ჩემს თავზე და შთამომავლებზეც ვგრძნობ”, – განაცხადა თამაზ მეჭიაურმა.