პარლამენტის თავმჯდომარე დავით უსუფაშვილი რუსეთის საგარეო საქმეთა სამინისტროს განცხადებას ეხმაურება, რომელიც საქართველოში დაგეგმილ ქართულ-ამერიკულ წვრთნებს ეხება:
“კითხვები გაჩენილა იმის თაობაზე, თუ რას ნიშნავს ჩემი განცხადება საქართველოს ოკუპირებულ ტერიტორიებთან დაკავშირებით და რატომ გაჟღერდა ეს სიტყვები სწორედ 4 მაისს, როდესაც ფოთის პორტში ამერიკული ტანკები გადმოიტვირთა ერთობლივი წვრთნების ჩასატარებლად.
განვმარტავ:
- ჩემი განცხადება გაკეთდა არა ამერიკული ტანკების ფოთში გადმოტვირთვის დღეს და გამო, რასაც თავისთავად მივესალმები, არამედ საქართველოს შეიარაღებული ძალების 25 წლის იუბილეს აღნიშვნის დღეს და ამ მოვლენისადმი მიძღვნილ საზეიმო ღონისძიებაზე.
- მე ვთქვი და კვლავაც ვადასტურებ, რომ საქართველოს ყოველ ჯარისკაცს, ყოველ მოქალაქეს და ყოველ პოლიტიკოსს, ამგვარი თარიღის აღნიშვნისას სიმაყესთან ერთად ტკივილიც გვეუფლება, ვინაიდან ჩვენი მთავარი სახელმწიფოებრივი მისია შეუსრულებელია – საქართველოს ტერიტორიული მთლიანობა იმ საზღვრებში, რაც აღიარებულია ყველა საერთაშორისო ორგანიზაციისა და კონტინენტის ყველა სახელმწიფოს მიერ, გარდა ერთისა, დარღვეულია სამხედრო ოკუპაციის გამო.
- კონფლიქტის მოგვარებაში შეიარაღებული ძალების გამოყენებაზე ცალმხრივად უარის თქმა, რასაც იურიდიული ძალა სწორედ საქართველოს მოქმედმა პარლამენტმა შესძინა, არ ნიშნავს იმას, რომ შეიარაღებული ძალების საზეიმო ღონისძიებაზე არ გავიხსენებთ სამშობლოსათვის დაღუპულ გმირებს ან ქართული ჯარი შეწყვეტს სამშობლოს დაცვაზე ზრუნვას.
- მე მადლობა მოვახსენე ჩვენს ამერიკელ და ევროპელ მეგობრებს და პარტნიორებს, რადგან სხვა ქვეყნის თვითმფრინავების მიერ საქართველოს დაბომბვა სწორედ მათმა დიპლომატიურმა ძალისხმევამ შეაჩერა და, სამწუხაროდ, მომავალშიც გვესაჭიროება მათი დახმარება მსგავსი მოვლენების პრევენციისთვის.
- მე იმედი გამოვთქვი, რომ ქართველი ჯარისკაცები და ოფიცრები ჩვენი პარტნიორების დახმარებით კიდევ უფრო აიმაღლებენ კვალიფიკაციას და პროფესიულ უნარ-ჩვევებს, რათა უკეთ შეასრულონ თავიანთი მისია როგორც საქართველოში, ისე საერთაშორისო ორგანიზაციების ეგიდით მოქმედ მისიებში საზღვარგარეთ.
სინამდვილეში, არც არაფერი იყო განსამარტი და საკითხავი თუ არა თითიდან თემის გამოწოვის პროპაგანდისტული საჭიროება…
მე, ჩემი მხრიდან, არ მაქვს კითხვები იმ ადგილობრივ და უცხოელ პოლიტიკურ ოპონენტებთან, რომელთა ხმაშეწყობილი რიტორიკა, ფაქტების დამახინჯებული ინტერპრეტაცია და მსგავსი ფოკუსირებული შემოტევები სულ უფრო სისტემურ ხასიათს იძენს – აქ ყველაფერი ნათელია”- ნათქვამია უსუფაშვილის განცხადებაში.
შეგახსენებთ, რომ „რია ნოვოსტის“ ინფორმაციით, მოსკოვი პროვოკაციულ ნაბიჯს უწოდებს ქართულ-ამერიკულ სამხედრო სწავლებას „Noble Partner 2016“-ს, რომლის მომზადების ფარგლებშიც საქართველოში ამერიკული სამხედრო ტექნიკა შევიდა.
„ნატოს სამხედროების მიერ საქართველოს ტერიტორიის „ათვისებას“ განვიხილავთ, როგორც პროვოკაციულ ნაბიჯს, რომელიც მიმართულია ამერიკავკასიის რეგიონში სამხედრო-პოლიტიკური მდგომარეობის შესარყევად. ამას ხელს უწყობს ვაშინგტონისა და მისი მოკავშირეების ღია ხელშეწყობა თბილისის რევანშისტული მისწრაფებებისადმი“, – ნათქვამია ლავროვის უწყების განცხადებაში.