თავდაცვის მინისტრის ყოფილ მოადგილეს, შესყიდვების დეპარტამენტის ყოფილ უფროსს და ჯუანშერ ბურჭულაძის ცოლის ძმას აღკვეთის ღონისძიების სახით პატიმრობა შეეფარდათ.
შეგახსენებთ, დაკავებულებს ბრალად ედებათ თავდაცვის სამინისტროსთვის სამედიცინო აპარატურის შესყიდვაზე დიდი რაოდენობით თანხის, 1 333 728 ლარის გაფლანგვა და 7-დან 11 წლამდე პატიმრობა ემუქრებათ.
როგორც პროკურატურის მიერ გავრცელებულ ინფორმაციაშია ნათქვამი, “საქართველოს თავდაცვის სამინისტროს მიერ სამხედრო ჰოსპიტალისთვის, მაგნიტურ-რეზონანსული ტომოგრაფის აპარატის შეძენის პროცესში მიზანმიმართული ქმედებებით შექმნეს არაკონკურენტული გარემო, რის შედეგადაც, არარეალური გარიგებების დადების გზით გაიზარდა აპარატის რეალური ღირებულება და 2 606 272 ლარად ღირებული მაგნიტურ-რეზონანსული ტომოგრაფის აპარატი საქართველოს თავდაცვის სამინისტროსთვის მიწოდებული იქნა 3 940 000 ლარად. დანაშაულებრივი ქმედებების შედეგად ბრალდებულებმა გაფლანგეს საქართველოს თავდაცვის სამინისტროს კუთვნილი 1 333 728 ლარი”.