გაფიცვის მეათე დღეს, გამგეობის წინ გამართულ საპროტესტო აქციაზე, მეშახტეებს თანადგომის ნიშნად სიტყვით მიმართეს მაჟორიტარმა დეპუტატმა და მუნიციპალიტეტის ხელმძღვანელმა პირებმა. მიტინგის მიმდინარეობამ მინდელის სახელობის შახტის ადმინისტრაციული შენობის ეზოში გადაინაცვლა. „ჯი-აი-ჯი ჯგუფის“ დირექტორის მოადგილემ, ბეჟან ბალავაძემ, შეკრებილთ განუცხადა, რომ გენერალურმა დირექტორმა, ვახტანგ ჩხეიძემ, გადადგომის შესახებ განცხადება დაწერა და მშრომელთა მოთხოვნების დაკმაყოფილება მათ კომპეტენციას აღემატება. მან მაღაროელებს სამსახურეობრივი მოვალეობის შესრულებისაკენ მოუწოდა.