“კატამ თხარა, თხარაო, ასე მოუვიდა ოპოზიციას”- ეს განცხადება დეოლიგარქიზაციის შესახებ კანონის მიღებასთან დაკავშირებით “ქართული ოცნების“ დეპუტატმა, ირაკლი ზარქუამ ჟურნალისტებთან საუბრისას გააკეთა. მისი თქმით, კანონპროექტზე ოპოზიციის პოზიცია მათი ორმაგი სტანდარტის გამოვლინებაა.
“დეოლიგარქიზაციის შესახებ“ კანონპროექტზე ოპოზიციის პოზიცია მათი ორმაგი სტანდარტის გამოვლინებაა. ჯერ კანონის მიღებას ითხოვდნენ. ავდექით და უკრაინული მოდელი გადმოვიტანეთ, რომელიც დასავლეთმა მოიწონა. მათ უკრაინას უთხრეს, რომ დიდი მოლოდინი აქვთ ამ კანონის შესრულებაზე. ამიტომ ზუსტად ავიღეთ და გადმოვიტანეთ უკრაინული მოდელი, რათა არავის ჩაეთვალა, რომ “ქართულ ოცნებას“ რაღაც თავისი კრიტერიუმები აქვს. ჰოი, საოცრება! – ახლა მას რადიკალური ოპოზიცია მხარს არ უჭერს. მე მესმის მათი, რადგან ვინც ოპოზიციას აფინანსებს, კანონში წარმოდგენილი კრიტერიუმების მიხედვით პოტენციური ოლიგარქია – ესენი არიან “ნაციონალური მოძრაობის“ დამფინანსებელი დავით კეზერაშვილი, “ლელოს“ დამფუძნებლები და დაფინანსებლები ხაზარაძე-ჯაფარიძე, აქეთ ჭიჭე ვაშაძის დამფინანსებლები – ფაქტიურად ამ კანონით, როგორც იტყვიან: „კატამ თხარა, თხარაო“ – ასე მოუვიდათ. ახლა არ იციან რა ქნან და როგორ აიცილონ. პირდაპირაც ვერც იმას ამბობენ, რომ “დეოლიგარქიზაციის შესახებ“ კანონის მიღება არ უნდათ“, – განაცხადა ირაკლი ზარქუამ.