“ოცნების” თავმჯდომარის ირაკლი კობახიძის თქმით, რუსეთთან სავაჭრო ურთიერთობების შეწყვეტა საქართველოს 10 ათასობით მოქალაქის ინტერესებს დააზიანებს. ეს განცხადება მან საქსტატის მონაცემების გამოქვეყნებასთან დაკავშირებით გააკეთა, რომლიოს თანახმადაც, რუსეთთან სავაჭრო ბრუნვა უკრაინის ომის დაწყების შემდეგ 50%-ით გაიზარდა.
როგორც კობახიძემ განმარტა, ევროპის სხვა ქვეყნებს რუსეთთან სავაჭრო ბრუნვა კიდევ უფრო მეტად აქვთ გაზრდილი:
„შეგიძლიათ გადახედოთ ევროპული ქვეყნების სტატისტიკას, სადაც ბევრად უფრო მეტად არის გაზრდილი სავაჭრო ბრუნვა ომის დაწყების შემდეგ. აქ საუბარია ბალტიისპირეთის, აღმოსავლეთ და დასავლეთ ევროპის სახელმწიფოებზე. ანუ ჩვენთან შედარებით ბევრად უფრო მეტად არის გაზრდილი სავაჭრო ბრუნვა რუსეთის ფედერაციასთან. ეს არის სტატისტიკა. სავაჭრო ურთიერთობები რუსეთის ფედერაციასთან ჩვენ გვქონდა ყოველთვის, მათ შორის, 2008, 2009, 2010, 2011, 2012 წელს, ეს სავაჭრო ურთიერთობები გრძელდება და ამ კუთხით არასდროს გადახედილა პოლიტიკა. სავაჭრო ურთიერთობების გაწყვეტა რუსეთის ფედერაციასთან, რა თქმა უნდა, ძალიან დაამძიმებს ჩვენი მოქალაქეების მდგომარეობას. საერთო დამოკიდებულება (რუსეთზე) არის 12 პროცენტი, რაც ნიშნავს იმას, რომ ჩვენი სავაჭრო ურთიერთობები არის დივერსიფიცირებული. რუსეთზე დიდი სავაჭრო ბრუნვა გვაქვს ევროკავშირთან და ჩინეთთანაც. ეს 12 პროცენტი რომ მოჭრა უცბად, ეს ნიშნავს, რომ ჩვენს მოქალაქეებს, ფერმერებს, გლეხებს პირდაპირ უწყდებათ კონკრეტული შემოსავალი, საქმე ეხება ათი ათასობით და შეიძლება ასი ათასობით ადამიანს. სავაჭრო ურთიერთობების შეწყვეტა რუსეთთან არ გაუკეთებია არავის, მათ შორის, არც უკრაინას, მათ შორის, 2014 წელს, არც წინა ხელისუფლებას 2008 წლის ომის შემდეგ, რადგან ამაში გარკვეული ლოგიკა არის. სავაჭრო ურთიერთობების შენარჩუნება იყო სხვადასხვა კუთხით მნიშვნელოვანი და რჩება, რომ არ დავაზიანოთ ჩვენი მოქალაქეების ინტერესები. მერწმუნეთ, რუსეთს ერთი გრამითაც ვერ დავაზიანებთ სავაჭრო ურთიერთობების შეწყვეტით, მაგრამ ეს სერიოზულად დააზიანებს საქართველოს ათი ათასობით მოქალაქის ინტერესებს, გამოიწვევს ეკონომიკის შეფერხებას და ა.შ. ეს ნაბიჯი არ უნდა გადადგა, როცა რუსეთს ვერ დააზიანებ და დააზიანებ საკუთარ მოქალაქეებს,”- განაცხადა კობახიძემ.