გავიმეორებ–არ ვიცი, ივანიშვილი მალავდა ამ პრორუსულ განწყობას თუ მერე გადაიხარა რუსეთისკენ, – აღნიშნულის შესახებ პოლიტოლოგი გია ხუხაშვილი “ალიასთან” საუბრისას აცხადებს.
გთავაზობთ ინტერვიუს:
– თქვენ ბიძინა ივანიშვილის პრემიერ-მინისტრობისას მის მრჩევლად მუშაობდით. იმ პერიოდში, მისთვის, მისი გარემოცვის წევრებისთვის შეგიმჩნევიათ რუსეთისკენ გადახრის სურვილი და რაიმე სახის ღია ქმედება ამ მიმართულებით?
–არა, ამის ნიშანწყალი არ იყო. ეს რომ შემემჩნია, უფრო ადრე წამოვიდოდი. ამის არანაირ დემონსტრირებას არ ახდენდა. ეჭვიც კი არ გასჩენია მაშინ არავის. მაშინ თამაშობდა, მალავდა თუ მაშინ ისე ფიქრობდა და მერე გადაიფიქრა და გადაიხარა რუსეთისკენ, არ ვიცი და ვერაფერს გეტყვით.
– როდის მოხდა გარდატეხა? რადიკალური ცვლილება? „ქართული ოცნების“ ხელისუფლებაში მოსვლის პირველ წლებში, თითქოს მივდიოდით დასავლეთისკენ, არა?
–ეს ძნელი სათქმელია. გავიმეორებ–არ ვიცი, ივანიშვილი მალავდა ამ პრორუსულ განწყობას თუ მერე გადაიხარა რუსეთისკენ. რა არის იცით?უკრაინის ომმა გაშიფრა ეს პრორუსული თამაში. მანამდე იყო ნიშნები – ომი გინდათ, ომი გინდათ… ეს ყველაფერი, რა მატრიცაც არის შექმნილი, რუსული თოქ-შოუების მატრიცაა. თქვენ განსხვავებას ვერ ნახავთ, ტელეკომპანია „იმედისა“ და რუსული თოქ-შოუების იდეოლოგიურ ხაზში. ზოგიერთ შემთხვევაში, ჩვენები ასწრებენ კიდეც, რუსზე უფრო მეტი რუსები არიან. ახლა კობახიძის განცხადება, რომ ქართველები ქსენოფობები არიანო, ხომ გითხარით, კრემლსაც კი არ ეყო ფანტაზია, ეს რომ ეთქვათ რუსულ მედიას, პოლიტიკოსებს თუ სახელისუფლებო ექსპერტებს.