უკრაინაში მიმდინარე ომის ბედი, საქართველოს ხელისუფლების პოზიცია და კონფლიქტის გარშემო გაერთიანებული მსოფლიო საზოგადოება, – ამ და სხვა თემებთან დაკავშირებით, “მეტრონომი” უკრაინაში ქართული ლეგიონის მეთაურთან, მამუკა მამულაშვილთან ინტერვიუს გთავაზობთ:
მეტრონომი: რა ეტაპზეა ამჟამად უკრაინაში მიმდინარე ომი, სად იმყოფებით და როგორია თქვენი პოზიცია?
მამულაშვილი: ჩვენი ნაწილები ფრონტის მთელ ხაზზეა გაშლილი. ჩვენ არ გვაქვს გარკვეული ქვეითის ფუნქცია და ნაწილები მივლინებულია იმ ადგილებზე, სადაც ყველაზე ცხელი წერტილებია.
უკრაინის შეირაღებული ძალების მოქმედების შედეგად რუსული ჯარები გარკვეული ადგილებიდან გადიან. ხარკოვის ოლქი თითქმის მთლიანად გათავისუფლებულია, რაც შეეხება სამხრეთ-აღმოსავლეთს, ჯერ კიდევ საკმაოდ დიდი დაძაბულობაა. რუსები საჯარისო ფორმირებების დამატებას და მობილიზაციას ცდილობენ. საკმაოდ ინტენსიური ბრძოლები მიდის ამ მიდამოებში.
მეტრონომი: როგორ ფიქრობთ, რა არის უკრაინის შეიარაღებული ძალების წარმატების ძირითადი მიზეზი/რუსების წარუმატებლობის მიზეზი?
მამულაშვილი: შემიძლია ვთქვა, რომ რუსებმა ვერანაირ წარმატებას ვერ მიაღწიეს. შემოვიდნენ გარკვეულ რეგიონებში, დადგნენ და მას შემდეგ მხოლოდ უკან იხევენ. უკრაინის წარმატების მიზეზი არის ის, რომ მსოფლიო საზოგადოება მას მხარს უჭერს. ამასთან უკრაინის შეიარაღება მეტად უფრო თანამედროვე და ზუსტი ხდება “ლენდ ლიზის” კანონის მიღების შემდეგ. ამის შედეგად, რუსეთს უკრაინის ტერიტორიაზე წარმატების მიღწევა ურთულდება. ვფიქრობ, რომ ზაფხულის ბოლომდე ეს კონფლიქტი უკრაინის გამარჯვებით დასრულდება და უკრაინა დაიბრუნებს ოკუპირებულ ტერიტორიებს.
მეტრონომი: რას ფიქრობთ, როგორ შეცვლის მარიუპოლში განვითარებული მოვლენები უკრაინაში მიმდინარე ომის ბედს?
მამულაშვილი: “აზოვსტალი” არის ისეთივე ქარხანა, როგორც საქართველოში რუსთავის მეტალურგიული. წარმოიდგინეთ, რამდენად გაუჭირდათ რუსებს უბრალოდ ქარხნის დაპყრობა და სხვა ადგილებში რამდენად დიდ სირთულეებს ხვდებიან, როდესაც მათი ტერორისტული ჯარები, სხვადასხვა დასახლებების მითვისებას ცდილობენ.
რუსებს ყირიმში წყლის მიწოდებასთან დაკავშირებით პრობლემები ჰქონდათ და ფაქტიურად ამ პრობლემის გადაჭრას ცდილობენ. მარიუპოლის აღებას მთელი რუსეთის ჯარების რესურსები დასჭირდა. გარდა ამისა, მარიუპოლში გამოყენებული იყო მომწამვლელი გაზები. მათ ამ ქალაქში შესვლა ძალიან გაუჭირდათ. ერთადერთი, რაც მათ შეძლეს იყო ის, რომ გაანადგურეს დიდი რაოდენობით მშვიდობიანი მოსახლეობა. რუსეთის მიზანი ყოველთვის მშვიდობიან მოსახლეობაზე იერიშის მიტანაა. რომ დააკვირდეთ ისინი სწორედ სამოქალაქო შენობებზე ესხმიან თავს.
მეტრონომი: როგორ ფიქრობთ, მიაღწია თუ არა რუსეთმა რაიმე სახის მნიშვნელოვან წარმატებას?
მამულაშვილი: რამოდენიმე ოლქში არიან შესულები და ბრძოლები მიმდინარეობს. ალბათ გესმით რუსეთი უდიდესი ქვეყანაა, რომელიც მთელ თავის რესურსს იყენებს. ომის დაწყების შემდეგ, ბევრად მეტი ტერიტორიები გაიწმინდა რუსებისგან.
მეტრონომი: როგორ შეაფასებთ საქართველოს ხელისუფლების პოზიციას უკრაინასთან მიმართებაში. რა გააკეთეს მათ უკრაინის მხარდასაჭერად და რა შეუძლიათ კიდევ, რომ მოიმოქმედონ?
მამულაშვილი: საქართველოს მთავრობას უკრაინის დასახმარებლად არაფერი გაუკეთებია და არც აკეთებს. მათ მოღალატეობრივი პოზიცია აქვთ სტრატეგიული პარტნიორის მიმართ და ეს ნიშნავს, რომ ასეთივე პოზიცია აქვთ საქართველოს მიმართაც. უკრაინა ერთადერთი ქვეყანა იყო, რომელმაც საქართველოს დახმარების ხელი გაუწოდა, როგორც 90-იან წლებში, ისევე 2008 წლის ომის დროს. საქართველოს მთავრობის დღევანდელი პოზიცია ქართველი ხალხის ნებას არ გამოხატავს. ეს არის კოლაბორანტული პოლიტიკა, რასაც დღეს ატარებს რუსეთის ხელქვეითი ივანიშვილი. ყველასთვის ნათელია, რომ დღეს ივანიშვილი პუტინის მიმართ ლოიალურ პოზიციას გამოხატავს.
მეტრონომი: როგორ შეაფასებთ დასავლეთის მიერ უკრაინის მიმართ გამოხატულ მხარდაჭერას. დროული იყო თუ არა ის და რამდენად ცვლის ომის ბედს?
მამულაშვილი: დასავლეთი ბიუროკრატიის გამო აგვიანებს უკრაინისთვის იმ დახმარების მიწოდებას, რაზეც ხელი უკვე მოწერილია. ეს არის რეაქტიული არტილერიის დანადგარები, რომელიც უნდა ყოფილიყო უკრაინაში და ომის მიმდინარეობის ბედს მკვეთრად შეცვლიდა.
ასევე არ მოუწოდებიათ “პატრიოტები”, თუმცა ამაზე შეთანხმება არ ყოფილა და არაუშავს, რასაც ბალისტიკურ რაკეტებზე ვერ ვიტყვით. რატომ ხდება ეს არვიცი, მაგრამ ძალიან შენელებული ტემპით მიმდინარეობს იარაღის მიწოდება. ჩვენთვის ფრონტის ხაზზე არაფერი შეცვლილა, ვიცოდით, რუსეთს ვებრძოდით და როდესაც საზოგადოებამ შეიტყო, რომ დაიწყო ფართომასშტაბიანი ომი, ბევრ ქვეყანას მოუწია პოზიციის გამოხატვა. დასავლეთმა ბევრი გააკეთა, მაგრამ ის შეიარაღება, რაც უკრაინას ომის გარდატეხისთვის სჭირდება, ჯერ არ მიუწოდებიათ.
მეტრონომი: როგორ შეაფასებთ უკრაინის ხელისუფლების მხრიდან ქართული მხარის მისამართით მოწოდებებს “მეორე ფრონტის” გახსნასთან დაკავშირებით?
მამულაშვილი: მსგავსი სახის განცხადებები არ გამიგია უკრაინის მთავრობისგან. ჯერ არაკორექტული იქნებოდა მოეწოდებინათ, რომ საქართველოს დაეწყო ომი. როგორც რჩევა შესაძლოა, რომელიმე უკრაინელ პოლიტიკოსს გაეჟღერებინა, თუმცა ეს სახელმწიფო პოზიციად ვერ ჩაითვლება. ნებისმიერ პოლიტიკოსს საკუთარი აზრის გამოთქმა შეუძლია. კიბატონო, შესაძლოა, საქართველოსთვის ხელსაყრელი ყოფილიყო ეს მომენტი, რომ გამოეყენებინა, რადგან რუსეთის ჯარი დასუსტებულია და ჩვენ ოკუპაციის ქვეშ ვიმყოფებით. პრორუსი მთავრობა არამგონია, ამის ავტორი გახდეს, 100%-ით მგონია, რომ ეს, ასე არ იქნება.
ცალკეული ადამიანების პოზიცია არ ნიშნავს, რომ უკრაინის მთავრობა საქართველოს ომის დაწყებისკენ მოუწოდებს, სისულელეა, ასეთი რამ დიპლომატიაში არ ხდება. ჩემი აზრით, შეეძლო საქართველოს, მაგრამ არვიცი ქართულ ჯარს რამდენად აქვს რესურსი დაიბრუნოს ტერიტორიები. ვიცი რომ საქართველოს შეიარაღებული ძალები საკმაოდ დასუსტებულია და თითქმის 90-იანებს დაუბრუნდა. უამრავი ოფიცერი სამუშაოდ ევროპის ქვეყნებში წავიდა. ეს რესურსები დაცლილია და ამიტომ ლაპარაკი იმაზე, რომ საქართველოს ჯარს დღეს შეუძლია მკვეთრი ზომები მიიღოს, არარეალურია.
მეტრონომი: არის საუბარი იმაზე, რომ რუსეთი საქართველოზე გავლით სანქციებს თავს არიდებს, ამასთან დაკავშირებით, რას ფიქრობთ?
მამულაშვილი: დარწმუნებული ვარ, რომ საქართველოს მთავრობა დღეს რუსეთს კრიზისიდან გამოსვლაში ხელს უწყობს. ფაქტობრივად, ერთი რუსი ოლიგარქი მართავს საქართველოს და ლაპარაკი იმაზე, რომ ბორის ივანიშვილი ქვეყნის ინტერესებს გაითვალისწინებს, ძალიან ეჭვი მეპარება. საქართველოში დღეს უამრავი რუსული სპეცსამსახურები მუშაობენ და ფაქტიურად ამას არავის უმალავენ.
მეტრონომი: რა შეუძლია, საქართველოს ხელისუფლებას, რომ გააკეთოს? თქვენ რას ურჩევდით?
მამულაშვილი: მე პრორუსულ ხელისუფლებას ვერაფერს ვერ ვურჩევ, რა უნდა ვუთხრა, რომ დავიბრუნოთ აფხაზეთი? სისულელეა. ამათ აქვთ თავიანთი პრორუსული პოზიცია. საქართველოს სჭირდება რუსული ოკუპაციისგან გათავისუფლება. იმედი, რომ მქონდეს საქართველოს ხელისუფლების, შემეძლო რაიმე რჩევა მიმეცა, მაგრამ ძალიან ეჭვი მეპარება, რომ გაითვალისწინებენ.
მეტრონომი: რა შემთხვევაში დასრულდება რუსეთ-უკრაინის ომი, რა უნდა გაკეთდეს ცეცხლის შესაწყვეტად?
მამულაშვილი: ამისთვის ერთადერთი რამ უნდა გაკეთდეს, დასავლეთმა უნდა გადმოგვცეს ის ტექნოლოგია და სპეციფიკა, რაც დღეს უკრაინას სჭირდება. ეს არის შორ მანძილზე მსროლელი არტილერია, რომელიც ამ ომს ძალიან მალე დაასრულებს. სხვა რუსეთთან ურთიერთობის გზა არ არსებობს, არც დიპლომატიური და არც პოლიტიკური.
რუსეთს ესმის მხოლოდ ძალა, რაც უკრაინამ უკვე აჩვენა და კიდევ ბოლომდე უნდა აჩვენოს. რუსეთის შეიარაღებული ძალები იქნება დამთავრებული, რადგან ისინი ომისთვის მზად არ იყვნენ. მათ თავიანთი სამხედრო ძალების უდიდესი ნაწილი უკვე დაკარგეს. კომპრომისი ყველანაირად გამორიცხულია. სამხედრო გზა არის ერთადერთი რამ, რითიც ეს კონფლიქტი შესაძლოა, რომ გადაწყდეს.
ავტორი: მარიამ ხულიაშვილი