მე ვარ საქართველოს პრემიერ-მინისტრი, გვარამია იყო კერძო კომპანიის დირექტორი, რომელმაც, როგორც მე ვიცი, მოიპარა ფული თუ გააკოტრა კომპანია. რა შუაშია? მე რომ მადარებთ და ჩემი ოჯახის წევრებს, რატომ სარგებლობს თურმე პრემიერ-მინისტრის ოჯახი სახელმწიფო მანქანებით, ამას ეუბნებით ხალხს. ჯერ ერთი, ეს არის ტყუილი. მე კანონით მეკუთვნის სახელმწიფო მანქანები, ამის მიუხედავად, ჩემი მანქანით გადავადგილდები. სხვა თემებზე მე აღარ მსურს საუბარი
ამის შესახებ საქართველოს პრემიერ-მინისტრმა, ირაკლი ღარიბაშვილმა ერთ-ერთ ჟურნალისტს უპასუხა, რომელმაც მას ჰკითხა – თუ პრემიერის ოჯახის წევრები გადაადგილდებიან სამსახურეობრივი მანქანით, რატომ არის ეს დანაშაული ნიკა გვარამიასთვის, რომელსაც “რუსთავი2”-ის საქმეზე 3 წლითა და 6 თვით პატიმრობა მიუსაჯეს.
ბრალდების ერთ-ერთი ეპიზოდი კომპანია “პორშე ცენტრთან“ გაფორმებულ სარეკლამო ხელშეკრულებას შეეხებოდა. პროკურატურის მტკიცებით, ნიკა გვარამიამ და მისმა ოჯახმა საკუთრებაში 76 700 ევროს ღირებულების ავტომობილი მიიღო, რითაც, ბრალდების მიხედვით, “რუსთავი 2“-ს მნიშვნელოვანი მატერიალური ზიანი მიადგა.