ბელარუსში სამხედრო ძალების მზადყოფნის მოულოდნელი შემოწმება დაიწყო, – აღნიშნულის შესახებ ბელორუსის თავდაცვის სამინისტრო და უკრაინის შეიარაღებული ძალების გენერალური შტაბი იუწყება.
როგორც ინფორმაციაში ვკითხულობთ, ბელარუსის ჯარები აგრძელებენ უკრაინა-ბელორუსიის საზღვრის მონაკვეთების დაფარვას ბრესტისა და გომელის რეგიონებში.
“დავალებების შესასრულებლად მზადყოფნის შესამოწმებლად, რესპუბლიკის შეიარაღებული ძალების 465-ე სარაკეტო ბრიგადის ერთი სარაკეტო დივიზია მუდმივი განლაგების ადგილიდან დანიშნულების ზონაში გადადის”, – ნათქვამია განცხადებაში.
როგორც ბელარუსის თავდაცვის უწყებაში აცხადებენ, მიმდინარე ღონისძიებები ჯარების მომზადების ერთ-ერთი ყველაზე ეფექტური ფორმაა და არანაირ საფრთხეს არ უქმნის არც ევროპულ საზოგადოებას, არც კონკრეტულად მეზობელ ქვეყნებს.
ცნობისთვის, რუსეთმა უკრაინაში ფართომასშტაბიანი ომი 24 თებერვალს დაიწყო და ოკუპანტის აგრესია ამ დრომდე გრძელდება.