მამაკაცს, რომელმაც ბორჯომში მეუღლეს ცივი იარაღით 16 ჭრილობა მიაყენა, პროკურატურამ ბრალდება წარუდგინა. აღნიშნულთან დაკავშირებით უწყება ინფორმაციას ავრცელებს.
“საქართველოს პროკურატურამ, ბორჯომში, დამამძიმებელ გარემოებებში განზრახ მკვლელობის მცდელობისა და ოჯახური ძალადობის ჩადენის ფაქტზე, გ.კ.-ს ბრალდება წარუდგინა.
შინაგან საქმეთა სამინისტროს მიერ ჩატარებული გამოძიებით დადგინდა, რომ 1-ელ მაისს, ბრალდებულმა, ბორჯომში, გენდერის ნიშნით შეუწყნარებლობის მოტივით, განსაკუთრებული სისასტიკით სცადა მეუღლის მოკვლა, კერძოდ, მას დანით თექვსმეტი ჭრილობა მიაყენა. ბრალდებული ასევე, მეუღლის დედას ფიზიკურად გაუსწორდა.
პროკურატურამ ბრალდებულს საქართველოს სისხლის სამართლის კოდექსის 126-ე პრიმა მუხლის მეორე ნაწილის „ე“ ქვეპუნქტით, 11 პრიმა, 19-109-ე მუხლის მეორე ნაწილის ,,დ1“ და ,,ვ“ ქვეპუნქტებით და მესამე ნაწილის ,,ბ“ და“ე“ ქვეპუნქტებით (განზრახ მკვლელობის მცდელობა, დამამძიმებელ გარემოებებში) წარუდგინა ბრალდება, რაც სასჯელის სახედ და ზომად 16-დან 20 წლამდე თავისუფლების აღკვეთას ითვალისწინებს”, – აღნიშნულია ინფორმაციაში.
მათივე ცნობით, პროკურატურის შუამდგომლობის საფუძველზე, სასამართლომ ბრალდებულს აღკვეთის ღონისძიების სახით პატიმრობა შეუფარდა.