ახალი ამბები მთავარი პოლიტიკა სამართალი

თეა წულუკიანის უპასუხისმგებლო განცხადება – საკონსტიტუციო სასამართლო მინისტრის წინააღმდეგ

საქართველოს საკონსტიტუციო სასამართლო იუსტიციის მინისტრ თეა წულუკიანის განცხადებას ეხმაურება და განცხადებას არვცელებს. სასამართლოს განცხადებაში ნათქვამია, რომ ისინი შეშფოთებულები არიან თეა წულუკიანის მიერ გაკეთებული ტენდენციური და უპასუხისმგებლო განცხადებით.

„საქართველოს საკონსტიტუციო სასამართლო მიზანშეწონილად თვლის, გამოეხმაუროს საქართველოს იუსტიციის მინისტრის 2016 წლის 25 იანვარს გაკეთებულ განცხადებას.

საკონსტიტუციო სასამართლო შეშფოთებულია საქართველოს იუსტიციის მინისტრის მიერ გაკეთებული ტენდენციური და უპასუხისმგებლო განცხადებით.

იუსტიციის მინისტრი აღნიშნავს, რომ დაგეგმილი რეფორმა თითქოს  განპირობებულია იმით, რომ საკონსტიტუციო სასამართლოს მოსამართლეს არ აქვს  განსხვავებული აზრის გამოთქმის გარანტირებული უფლება.

შევახსენებთ იუსტიციის მინისტრს, რომ საკონსტიტუციო სასამართლოს მოსამართლის მიერ განსხვავებული აზრის გამოთქმის შესაძლებლობა, მისი გამოქვეყნების უფლება უზრუნველყოფილია როგორც კანონმდებლობით, ასევე დამკვიდრებულია სასამართლო პრაქტიკით. არც ერთ საქმეზე, არც ერთ მოსამართლეს არასოდეს ჰქონია განსხვავებული აზრის დაწერასთან დაკავშირებით რაიმე სახის შეფერხება.

საკონსტიტუციო სასამართლოში, მისი არსებობის მანძილზე, არაერთი მოსამართლის განსხვავებული აზრი დაწერილა, მათ შორის ისეთიც, რომლებიც სამომავლო გადაწყვეტილებებს დასდებია საფუძვლად. ამდენად, ყველას, მათ შორის იუსტიციის მინისტრსაც, აქვს შესაძლებლობა, გაეცნოს საკონსტიტუციო სასამართლოს მოსამართლეთა მიერ გამოქვეყნებულ არაერთ განსხვავებულ აზრს.

აშკარაა, რომ განცხადების გაკეთებისას იუსტიციის მინისტრი აპელირებდა  საქმეზე „გიორგი უგულავა საქართველოს პარლამენტის წინააღმდეგ“  მიღებული გადაწყვეტილების გამოცხადებასთან დაკავშირებით განვითარებულ სამწუხარო მოვლენებზე.

შევახსენებთ ქალბატონ მინისტრს, რომ აღნიშნული საქმე სათათბირო ოთახში მოსამართლეთა მიერ განიხილებოდა თითქმის 2 თვის განმავლობაში. საკონსტიტუციო სასამართლოს ყველა წევრს ჰქონდა შესაძლებლობა, არაერთგზის გამოეხატა საკუთარი პოზიცია საქმესთან დაკავშირებულ ყველა საკითხზე. გარდა ამისა, გადაწყვეტილების საბოლოო პროექტს კენჭი ეყარა გადაწყვეტილების გამოცხადებამდე ერთი კვირით ადრე, რა დროსაც მოსამართლეებს ჰქონდათ შესაძლებლობა, საბოლოოდ დაეფიქსირებინათ საკუთარი პოზიცია და სურვილის შემთხვევაში დაეწერათ განსხვავებული აზრი.

 

საკონსტიტუციო სასამართლო ასევე მიზანშეწონილად მიიჩნევს, აღნიშნოს, რომ საქართველოს კანონმდებლობისა და საქართველოს საკონსტიტუციო სასამართლოს პრაქტიკის თანახმად, სასამართლოს გადაწყვეტილება ძალაში შედის სასამართლო დარბაზში მისი გამოცხადების მომენტიდან,  არ არის და არც უნდა იყოს დამოკიდებული აღმასრულებელი ხელისფლების მიერ მის გამოქვეყნებაზე. საქართველოს საკანონმდებლო მაცნეში გადაწყვეტილების გამოცხადება ემსახურება გადაწყვეტილების მაქსიმალური ხელმისაწვდომობის უზრუნველყოფას და იგი არ შეიძლება განხილულ იქნეს გადაწყვეტილების ძალაში შესვლის წინა პირობად“ – ნათქვამია განცხადებაში.

საუბარია თეა წულუკიანს გუშინ გაკეთებულ განცხადებაზე, სადაც მან თქვა, რომ საკონსტიტუციო სასამართლო ვეღარ შეძლებს, რომ თავის რომელიმე წევრზე ზეწოლა მოახდინოს:

„საკონსტიტუციო სასამართლო ვეღარ შეძლებს, რომ ზეწოლა განახორციელოს თავის რომელიმე წევრზე, რომელსაც უბრალოდ სჭირდება დრო, რომ განსხვავებული აზრი შეადგინოს. ვეღარ შეძლებს საკონსტიტუციო სასამართლო იმას, რომ არ მიაქციოს ყურადღება, რას ფიქრობს უმცირესობაში დარჩენილი მისივე მოსამართლე; გვერდი აუაროს საკანონმდებლო მაცნეს, თავის ვებგვერდზე გამოაქვყნოს გადაწყვეტილება და იძახოს, რომ ეს არის ოფიციალური ბეჭდვითი ორგანო; ასევე, მაგალითად რომელიმე საკონსტიტუციო მოსამართლემ გაიხანგრძლივოს თავის ვადა ხელოვნურად, ვერც ამას ვერ შეძლებს,“ – განაცხადა თეა წულუკიანმა.

ავიაბილეთები იაფად
იტვირთბა....