პარლამენტში ინიცირებული პროექტის მიხედვით, ავტომობილის მართვის დროს მძღოლის მიერ მობილური საშუალებით სარგებლობისთვის დაწესებული ჯარიმა იზრდება და შესაბამისი ადმინისტრაციული სანქცია 10 ლარის ნაცვლად, 30 ლარი იქნება.
ცვლილებები „საგზაო მოძრაობის შესახებ“ კანონთან ერთად „ადმინისტრაციულ სამართალდარღვევათა კოდექსშიც“ შედის.
მძღოლის მიერ ქვეითად მოსიარულეებთან მიმართებაში წესების დარღვევაზე ადმინისტრაციული პასუხისმგებლობა მკაცრდება – პირველი დარღვევის შემთხვევაში ჯარიმა – 40 ლარი იქნება, იმავე ქმედების განმეორებით ჩადენის შემთხვევაში კი – 150 ლარი.
ადმინისტრაციული ჯარიმა 200-დან 300 ლარამდე იმ პირის მიმართ იზრდება, რომელიც საქალაქო, საქალაქთაშორისო ან საერთაშორისო რეისებით მგზავრების რეგულარული გადაყვანისას სიჩქარეს გადააჭარბებს.
ასევე იზრდება ავტომობილის მართვის დროს მძღოლის მიერ მობილური საშუალებით სარგებლობისთვის დაწესებული ჯარიმა და შესაბამისი ადმინისტრაციული სანქცია 10 ლარის ნაცვლად, 30 ლარი იქნება.
ძალაში რჩება ალკოჰოლის ზემოქმედების ქვეშ მყოფი მძღოლისთვის ავტომანქანის მართვის მოწმობის 6 თვით შეჩერება, თუმცა მართვის უფლების აკრძალვის ჯარიმით შეცვლის წესი იცვლება. კერძოდ, თუკი ჯერ კიდევ მოქმედი კანონით, მოქალაქეს შეუძლია, მართვის უფლების აკრძალვის მეორე დღიდანვე მისი ჯარიმით შეცვლა მოითხოვოს, პარლამენტში ინიცირებული პროექტით, პირს ასეთი უფლება მხოლოდ 3 თვის გასვლის შემდეგ ექნება.
ავტომობილებთან და საგზაო მოძრაობასთან დაკავშირებული საკანონმდებლო პაკეტის განხილვზე პირველი საკომიტეტო სხდომა დარგობრივი ეკონომიკისა და ეკონომიკური პოლიტიკის კომიტეტმა დანიშნა, რომელიც 21 იანვარს გაიმართება.
მთავრობის საკანონმდებლო ინიციატივას კომიტეტის წევრებს შს მინისტრის მოადგილე შალვა ხუციშვილი წარუდგენს.
“საგზაო მოძრაობის შესახებ” კანონსა და რამდენიმე სხვა კანონში დაგეგმილი ცვლილება მარჯვენასაჭიანი და საჭეგადატანილი მანქანების რეგისტრაციის აკრძალვას და მართვის მოწმობებზე ქულათა სისტემის დაწესებას ითვალისწინებს. გარდა ამისა, საკანონმდებლო პაკეტით 3-დან 6-წლამდე ავტომობილები შეღავათიანი დაბეგვრის რეჟიმში ექცევა. მნიშვნელოვნად იზრდება აქციზის გადასახადი 9 წელზე მეტი ასაკის ავტომობილებისთვის. შეღავთიან რეჟიმში გადადის მოპედებისა და მოტოციკლების აქციზით დაბეგვრაც.
წყარო: ინტერპრესნიუსი