პარტია ნაციონალური მოძრაობის წევრი ეკა ხერხეულიძე, მიხეილ სააკაშვილთან შეხვედრის შემდეგ აცხადებს, რომ ყოფილი პრეზიდენტი რუსთაველის გამზირზე საკმაოდ ხალხმრავალ აქციას ელოდება.
მისივე თქმით, სააკაშვილის ჯანმრთელობის მდგომარეობა არცისე კარგია და უახლოეს დღეებში უცხოელ ექიმებს ელოდებიან, რომლებიც მისი ჯანმრთელობის მდგომარეობას შეისწავლიან.
“ხალხის რეაქციას ხედავთ, ეს არის ნამდვილი საქართველო, ეს არის ის საქართველო, რომელსაც უკეთესი, თავისუფალი ქვეყანა სურს და ამ კაცთან ერთად აქვს გათავისებული ის, რომ ხალხს თუ რამე კარგი უნახავს და ბედნიერი დღეები ჰქონია, იმ ადამიანის მოტანილია, რომელიც დღეს დატყვევებულია.
ჩვენი ყველას ვალია, რომ თუ სირცხვილით არ გვინდა ვიცხოვროთ, ეს ადამიანი დროზე უნდა დავიხსნათ ტყვეობიდან. სააკაშვილი საკუთარ 54-ე დაბადების დღეს საპატიმროში ხვდებოდეს სირცხვილია.
მიხეილ სააკაშვილის მთლიანი ყურადღება დღეს მიპყრობილია რუსთაველის გამზირზე, ვინაიდან ელოდება საკმაოდ ხალხმრავალ აქციას, რომელიც თავისთავად რეზონანსული იქნება. ამას მე გეუბნებით”, – აცხადებს ხერხეულიძე.
ცნობისთის, დღეს მიხეილ სააკაშვილის დაბადების დღეა. რუსთაველის გამზირზე აქცია 18 საათზეა დაანონსებული.