ბუნებრივ აირზე ნელი ტემპით იზრდება მოთხოვნა საქართველოში, – განაცხადა “სოკარის” საქართველოს წარმომადგენლობის ხელმძღვანელმა, მაირ მამედოვმა. მისი თქმით, ჯერ არ ყოფილა მიზეზი, რომ ჩვენ საქართველოსთვის საჭირო ოდენობის გაზის მიწოდება ვერ შეგვძლო. საქართველოს ბუნებრივი აირი გეგმის მიხედვით მიეწოდება. გვაქვს ორი გაზსადენი, რომელიც სრული დატვირთვით მუშაობს. ზამთარში ბუნებრივ აირზე მოთხოვნა გაცილებით მეტია, თუმცა ჩვენ გვაქვს საკმარისი რესურსი და შესაბამისად, მიწოდებასაც ვზრდით”, – განაცხადა მამედოვმა.
შეგახსენებთ, “სოკარის” წარმომადგენელს თბილისში ოფიციალური შეხვედრები დღეს აქვს ჩანიშნული. საქართველოს ენერგეტიკის მინისტრმა, კახი კალაძემ განაცხადა, რომ ბუნებრივი აირის მოხმარება არის გაზრდილი.
“დღეს ჩვენი ქვეყნის ბუნებრივი აირის საერთო მოხმარება არის ორი მილიარდ ხუთასი ათასი კუბური მეტრი. ეს 2012 წელთან შედარებით 35-38%-ით არის გაზრდილი. 2015 წლის მოცულობა 2014 წელთან შედარებით 19%-ითაა გაზრილი. დღეს ყოველდღიურად ჩვენ გვიწევს დაახლოებით 11 მილიონზე მეტი კუბური მეტრი გაზის შემოტანა. დაგისახელებთ ამ 11 მილიონის შემადგენელ ნაწილებს: ეს არის 6 მილიონი კუბური მეტრი “სოკარიდან” წამოღებული ბუნებრივი აირი, ანუ იმ მილსადენით, რომელსაც ჰქვია “ყაზახი”. 2 900 000 მილიონ კუბური მეტრი არის შაჰდენიზიდან მიღებული ბუნებრივ აირი და 2,-2,5 მილიონი კუბური მეტრი არის 10% იმ მოცულობისა, რომელსაც ჩვენ ვიღებთ რუსეთისგან საქართველოს გავლით სომხეთში მიმავალი მილსადენით”, – განაცხადა კალაძემ.