პარტია ნაციონალური მოძრაობის თავმჯდომარის, ნიკა მელიას განცხადებით, ხვალ, 15 ნოემბერს 15:00 საათიდან 17:00 საათამდე მათ მიერ დაგეგმილი აქციებით თბილისის ორივე სანაპიროზე საავტომობილო მოძრაობა გადაიკეტება.
მელია მოუწოდებს მოქალაქეებს, რომ ხვალ საავტომობილო გზების გამოყენება არ დაგეგმონ.
“ხვალ, 15 ნოემბერს, 15:00 საათიდან 17:00 საათამდე ჩვენი აქციებით გადაიკეტება საავტომობილო მოძრაობა თბილისის ორივე სანაპიროზე.
მე მესმის, რომ ეს გარკვეულ დისკომფორტს შეუქმნის მოქალაქეებს, მაგრამ ეს არის ძლიერი გამაფრთხილებელი სიგნალი რეჟიმისთვის, რომ არაძალადობრივი საპროტესტო მოძრაობა ყოველ დღე უფრო მწვავე გახდება!
სახლში ჯდომის დრო აღარ არის, თუ გვინდა ქვეყანას ავარიდოთ უბედურება და შემდგომში მრავალწლიანი სამოქალაქო გახლეჩა!
გთხოვთ ყველას, ვისაც ხვალ გაქვთ გადაუდებელი საქმე, არ დაგეგმოთ საავტომობილო გზების გამოყენება ამ საათებში!
რეჟიმი უნდა ვარყიოთ, სანამ არ ჩამოინგრევა!
პ.ს. შემოუერთდით სამართლიან ბრძოლას. გიწვევთ ხვალ აქციებზე და შეკრების ზუსტ ლოკაციებს დღეს საღამოს შეგატყობინებთ!”, – აღნიშნულია მელიას მიმართვაში.
შეგახსენებთ, რომ ნაციონალური მოძრაობა ქვეყანაში უწყვეტ საპროტესტო აქციებს აანონსებს.