წლების წინ, როცა დედა ერთ დღეს სახლში ტალახში ამოსვრილი და ემოციებით დატვირთული დაბრუნდა, მარიამმა გადაწყვიტა, რომ ის, რასაც დედა აკეთებდა, თავადაც უნდა ექცია ცხოვრების ნაწილად.
მას შემდეგ მაო გოშაძის და მარიამ ნანობაშვილის გუნდმა საქართველოში ერთ–ერთი ყველაზე ძლიერი და ტიტულოვანი ოფროუდელების რეპუტაცია დაიმკვიდრა. გასულ წელს დედა–შვილის წყვილმა საერთაშორისო სათავგადასავლო რალი რეიდი მოიგო. ახლა კი წლევანდელ შეჯიბრებაში ისევ მიიღეს მონაწილეობა.
„12 წელია უკვე ოფროუდი ჩემი ჰობია, ამით ძალიან დიდ ენერგიას ვიღებ. „Rally Adventure Georgia”-ს შეჯიბრში მონაწილეობამაც სწორედ ამიტომ მიმიზიდა. ეს არის 6 დღიანი, საკმაოდ სასიამოვნო, თავგადასავლებით სავსე რეიდი, რომელსაც საქართველოს გაცნობითი ხასიათიც აქვს.“ – ამბობს მაო გოშაძე.
რალი რეიდში მონაწილე ეკიპაჟ #52-ს წელს ახალი პარტნიორიც ჰყავს – “თეგეტა მოტორსი” დედა–შვილის წყვილს ავტომობილის გამართვაში და რალისთვის აუცილებელი ატრიბუტებით აღჭურვაში დაეხმარა. მაო და მარიამი ამბობენ, რომ ასეთ პარტნიორობას შეჩვეულები არ არიან და იმედი აქვთ, რომ თეგეტას მაგალითით სხვა კომპანიებიც იხელმძღვანელებენ.
“თეგეტა მოტორსთან პარტნიორობა ჩვენს შესაძლებლობებს ზრდის, რაც ცალსახად აადვილებს გეგმის შესრულებას და მიზნის მიღწევას. როდესაც ვიღაც არსებობს, ვისზეც შეგიძლია გადაანაწილო წინამოსამზადებელი ციებცხელება, ცხოვრება ერთი–ორად მშვენიერია.” – ამბობს მარიამ ნანობაშვილი.
“თეგეტა მოტორსის” კორპორაციული სოციალური პასუხისმგებლობის ერთ-ერთი მთავარი მიმართულება ქალთა გაძლიერებისთვის რეალური ნაბიჯების გადადგმაა, სწორედ ამით არის განპირობებული ოფროუდით გატაცებული დედა–შვილის მხარდაჭერაც საერთაშორისო რალისთვის სამზადისში.
მაო გოშაძე 20 წელი ჩოგბურთის მწვრთნელი-პედაგოგი იყო, უმაღლესი განათლებაც ამ მიმართულებით აქვს მიღებული, მაგრამ 12 წლის წინ ჩოგანი გვერდზე გადადო და საჭეს მიუჯდა. ქალი მძღოლის დანახვისას სტერეოტიპულ შეფასებებს საქართველოში ჯერ ვერ გავცდითო – მიხსნის, თუმცა ყველაზე ხშირად გამვლელები მაინც აღფრთოვანებას და გაკვირვებას გამოხატავენ.
“ქალის საქმე არააო – ამის თქმას ვერ ბედავენ, მაგრამ გულწრფელი გაკვირვება ნამდვილად ხშირია.” – აღნიშნა მარიამმაც.
„ის ადამიანია ბედნიერი, ვისაც აქვს ნაპოვნი საქმე, ის მიკრო სამყარო, სადაც მთლიანად იხარჯება, იღებს ემოციებს და რა თქმა უნდა, გასცემს კიდეც. ზოგი ხატავს, ზოგი ძერწავს, ზოგიც რაღაც კონსტრუქციებს აწყობს – ჩემი აზრით, როდესაც ადამიანი ამას პოულობს, ის უკვე ბედნიერია. ჩემთვის ოფროუდი არ არის მხოლოდ ავტომობილი, პირველ რიგში ეს არის გუნდი, ურთიერთობა და ბუნებასთან სიახლოვე, და მერე უკვე ავტომობილი.“ – მაო გოშაძე.
რალი რეიდი უგზოობაში საავტომობილო შეჯიბრებისა და ტურისტული ჯიპ–ტურის ნაზავია, რომელიც უკვე მესამე წელია წარმატებით ტარდება საქართველოში. 2021 წლის შეჯიბრი 11 ოქტომბერს დაიწყო და მონაწილეები ვაშლოვანის ნაკრძალისკენ გაემართნენ, შემდეგ კოჯრისკენ, კოჯორიდან მონაწილეები ვარძიაში გადავლენ, შემდეგ სამეგრელოსკენ აიღებენ გეზს, გაუკვალავი გზებით ბათუმში ჩავლენ და ისევ უკან თბილისისკენ.
ექსტრემალური თავგადასავალი სულ ერთი კვირა გაგრძელდება და მასში მონაწილე, ოფროუდელები ჯამში 1500 კილომეტრს დაფარავენ. რა შედეგითაც უნდა დასრულდეს 11 ოქტომბრის სათავგადასავლო რალი, ეკიპაჟი #52-ისა და „თეგეტა ჰოლდინგის“ ახლადდაბადებული თანამშრომლობა როგორც „თეგეტა მოტორსის“ ქალების მიმართ ერთგულების ერთგვარი დასტური, მომავალშიც გაგრძელდება.