საქართველომ წითელი ჯვრის ეროვნული საზოგადოებისგან სინოფარმის ვაქცინის 100 000 დოზა საჩუქრად მიიღო.
ამის შესახებ ინფორმაციას ჯანდაცვის სამინისტრო ავრცელებს.
უწყების განმარტებით, ჩინური წარმოების, ტრადიციულ მეთოდზე დამზადებული სინოფარმის ვაქცინა ერთ-ერთი ყველაზე გავრცელებული ვაქცინაა მსოფლიოში.
„სინოფარმის ვაქცინას ჯანმრთელობის მსოფლიო ორგანიზაციის მიერ გადაუდებელი გამოყენების ავტორიზაცია აქვს მინიჭებული. საქართველოში სინოფარმით ვაქცინაცია 18 წელს ზემოთ მოქალაქეებისთვის ხელმისაწვდომია. ვაქცინაციისთვის საჭირო 2 დოზა, 21 დღის ინტერვალით კეთდება. ვაქცინის შენახვის პირობები 2-დან 8 გრადუსამდეა.
საქართველოს წითელი ჯვრის საზოგადოება აქტიურად არის ჩართული მასობრივი იმუნიზაციის დროულად, ეფექტურად და უსაფრთხოდ განხორციელების პროცესში. COVID-19-ის საწინააღმდეგო ვაქცინაცია ინფექციისაგან თავდაცვის ეფექტური და უსაფრთხო საშუალებაა“, – აღნიშნულია უწყების მიერ გავრცელებულ განცხადებაში.
ჯანმრთელობის მსოფლიო ორგანიზაცია, საზოგადოებრივი ჯანდაცვის უწყებები და კვალიფიციური ექიმები რეკომენდაციას უწევენ COVID-19-ის საწინააღმდეგო ვაქცინაციას.