კოალიცია მედიის ადვოკატირებისთვის ნამოხვანში მიმდინარე პროცესს კიდევ ერთხელ ეხმაურება და სოციალურ ქსელში განცხადებას ავრცელებს.
მეტრონომი ამ განცხადებას უცვლელად გთავაზობთ:
“დღეს, 2021 წლის 11 აპრილს გავრცელებული ინფორმაციით, შინაგან საქმეთა სამინისტროს წარმომადგენლები ჟურნალისტებს ნამახვანში წასვლის და მუშაობის უფლებას არ აძლევენ. პოლიციამ გუმათჰესთან მოწყობილ სასაზღვრო-გამშვებ პუნქტზე შეაჩერა ყველა გადამღები ჯგუფი და მათ გადაადგილების უფლებას არ აძლევს. დღესვე პოლიციამ “რიონის მცველების” კარვები დაშალა, რაც მდინარე რიონის მოსალოდნელი ადიდებას დაუკავშირა.
ჩვენთვის ამ დრომდე უცნობია ჟურნალისტებისათვის პროფესიული საქმიანობის შეზღუდვის მიზეზები.
კოალიცია „მედიის ადვოკატირებისათვის“ წევრი ორგანიზაციები მოუწოდებენ შინაგან საქმეთა სამინიტროს იმოქმედოს ნამოხვანში მიმდინარე პროცესების მიმართ მაღალი საჯარო ინტერესის გათვალისწინებით.
კრიზისულ სიტუაციაში გადამწყვეტად მიგვაჩნია, ჟურნალისტებს მიეცეთ შესაძლებლობა თავისუფლად ასახონ განვითარებული მოვლენები, საზოგადოებას კი შეუნარჩუნდეს უფლება მიიღოს სრული ინფორმაცია ნამოხვანში მიმდინარე პროცესებზე”, – წერია განცხადებაში.
შინაგან საქმეთა სამინისტროს განცხადებით, სოფელ ნამახვანში, მდინარე რიონის წყლის დონე სასიგნალო ნიშნულს აღემატება, ამიტომ, მიიღეს გადაწყვეტილება, “საფრთხის შემცველი ზონიდან კარვების გატანისა და ადგილზე მყოფი მოქალაქეების უსაფრთხო ადგილას გადაყვანის შესახებ”.