მეტრონომს ანდრო ბარნოვის პარტიაში გაწევრიანება არ დაუდასტურეს
ლადო სადღობელაშვილი ირწმუნება, რომ ანდრო ბარნოვი, რომელმაც სულ ახლახანს დატოვა “ნაციონალური მოძრაობა” პარტია „გირჩში“ გადადის.“მეტრონომი“ ამ ინფორმაციის დასაზუსტებლად შეეცადა პირადად ანდრო ბარნოვს დაკავშირებოდა. მან ჩვენს ზარს არ უპასუხა. შემდეგ დავუკავშირდით პარტია “გირჩის” ერ-ერთ წევრ იაგო ხვიჩიას, რომელმაც ეს ინფორმაცია არ დაგვიდასტურა.
იაგო ხვიჩია: ეს ინფორმაცია არ შეესაბამება სიმართლეს. ბატონი ბარნოვი არ გაწევრიანებულა, ჩვენს პარტიაში. არც ვიცი და არ მაქვს ინფორმაცია, ამის სურვილი აქვს თუ არა მას. ეს გავრცელებული ჭორია.
“მეტრონომი“: პარტიაში სხვა საზოგადოებისთვის ცნობილი სახეები თუ გაწევრიანდნენ ან თუ იგეგმება?
– ცნობილი სახეები, საკმაოდ ისეთი შეფასებითი ტერმინია, რავიცი, ვისთვის ვინ არის ცნობილი, მაგრამ ერთი შემიძლია გითხრათ, ნიკა ქავთარაძე, რომელიც პარტიაში უკვე გაწევრინდა, სანდრო თარხან-მოურავი არ ვიცი თქვენთვის არის თუ არა ცნობილი. დანარჩენი ნელ-ნელა გამოჩნდება და მოხდება მათი წამოწევა.
“მეტრონომი“: პრეზენტაცია თუ არ ვცდები თელავში უკვე იყო?
– თელავში იყო ოფისების პრეზენტაცია. ჯერ პარტიის დაფუძნება არ მომხდარა. შესაბამისად, პარტიის პრეზენტაცია არ ყოფილა, სადაც იგეგმება ყველა ცნობილი თუ არაცნობილი სახის წარდგენა.