ქობულეთში, 31 წლის მამაკაცი მეზობლის სახლში სავარაუდოდ, სანადირო იარაღით მოკლეს. შემთხვევა გუშინ სოფელ ხალაში მოხდა.
მეზობლების თქმით, 31 წლის დათო შარაშიძეს, სავარაუდოდ ჯერ ფეხის არეში ესროლეს, შემდეგ კი სასიკვდილო ჭრილობა თავის არეში მიაყენეს. არსებული ინფორმაციით, დაპირისპირება თანასოფლელებს შორის მოხდა.
ასევე, სავარაუდო მკვლელი სოფელ ხალას მკვიდრია, ისინი ახლო მეზობლები იყვნენ. ახლობლებს მკვლელობის ვერსიებზე საუბარი უჭირთ.
ამასთან, მათთვის უცნობია, რა დაპირისპირება უძღოდა მკვლელობას წინ.
მეზობლების თქმით, მათთვის ასევე უცნობია, იყვნენ თუ არა სახლში მკვლელობის დროს ოჯახის სხვა წევრები.
არსებული ინფორმაციით, ეჭვმიტანილი შემთხვევის ადგილიდან მალევე მიიმალა.
მედიაში გავრცელებული ინფორმაციით, მოკლულ დათო შარაშენიძეს ფეხმძიმე მეუღლე დარჩა. ქობულეთის მერიის წარმომადგენლის განცხადებით კი გარდაცვლი მორწმუნე გახლდათ და ის მეღლესთან ერთად ჩაქვის ტაძრის მრევლი იყო.
“როგორც ვიცი, ძალიან კარგი მეზობლები იყვნენ. წინათ კონფლიქტი არ ჰქონიათ. სხვა დეტალები არ ვიცი. მოკლულ 31 წლის მამაკაცს ოჯახი ჰყავდა, მისი მეუღლე შვილს ელოდება”, – აცხადებს ქობულეთის მერიის წარმომადგენელი მზია აბაშიძე.
აღნიშნულ საქმესთან დაკავშირებით გამოძიება სისხლის სამართლის კოდექსის 19-108-ე მუხლით დაიწყო, რაც განზრახ მკვლელობას გულისხმობს.