ამ ქვეყანაში უნდა დამთავრდეს ზვიადისტების დრო – ეს სიტყვები ზუსტად 28 ოქტომბერს თქვა ხაზარაძემ, იმ არჩევნებიდან ოცდაათი წლის თავზე, როცა საქართველომ გაიმარჯვა კომუნისტურ და კომკავშირულ ბნელეთთან ბრძოლაში – ამის შესახებ, „ნაციონალური მოძრაობის“ წარმომადგენელი ნუგზარ წიკლაური სოციალურ ქსელში წერს, რითაც „ლელოს“ ლიდერის, მამუკა ხაზარაძის განცხადებას ეხმურება.
„ამ ქვეყანაში უნდა დამთავრდეს ზვიადისტების დრო – ასე თქვა მამუკა ხაზარაძემ – ლელოს ლიდერმა, ბანკირმა, ძველმა კომკავშირელმა და ეროვნულ მოძრაობასთან უდრეკმა მებრძოლმა…
თქვა ეს სიტყვები ზუსტად 28 ოქტომბერს – იმ არჩევნებიდან ოცდაათი წლის თავზე, როცა საქართველომ გაიმარჯვა კომუნისტურ და კომკავშირულ ბნელეთთან ბრძოლაში; იმ 28 ოქტომბერს, როცა ილია ჭავჭავაძემ, ქაიხოსრო ჩოლოყაშვილმა, მერაბ კოსტავამ და ზვიად გამსახურდიამ სძლიეს წითელ ბორის ძნელაძეს.
მერე იყო თავისუფლების რეფერენდუმი, საქართველოს დამოუკიდებლობა და წმინდა ომი ამ თავისუფლებისთვის.
მერე იყო დევნა საქართველოს ერთგულებისთვის; მიტინგების ხვრეტა და კრემლის რევანში.
მერე იყო დევნილი ზვიადის უმოწყალო მკვლელობა სამეგრელოს ტყეებში.
მათი დროშა ბორის ძნელაძე იყო და ჩვენი დროშა – საქართველო.
ზვიადისტების დრო უნდა დამთავრდესო… ოცდაათი წლის შემდეგ თქვა – ალბათ მარადიული ბრძოლაა თავისუფალი ქვეყნისთვის, მაგრამ ბორისძნელაძეობაც მარადიული“, – წერს წიკლაური.