19 წლის ფეხბურთელის, გიორგი შაქარაშვილის მკვლელობის საქმესთან დაკავშირებით, პროკურორმა, დავით ყაზარაშვილმა განაცხადა, რომ ხუთივე ბრალდებულმა, რომელსაც მკვლელობაში აქვთ ბრალი წაყენებული, გიორგი შაქარაშვილი წყალში ჩააგდო.
პროკურორი დაცვის მხარის განცხადებებსაც პასუხობს, რომლის მიხედვითაც, პროკურატურას არ აქვს იმის პირდაპირი მტკიცებულება, თუ როგორ ჩააგდეს გიორგი შაქარაშვილი წყალში, ან საერთოდ ჩააგდეს თუ არა.
“რაც შეეხება ადვოკატების კომენტარს, გამიკვირდებოდა, რომ ეთქვათ, ბრალდების მხარეს შესავალი სიტყვა გაჯერებული იყო მტკიცებულებებითო, რა თქმა უნდა, ისინი იტყოდნენ, რომ არ იყო მტკიცებულებები, რომ ბრალდების მხარე სხვადასხვა ინფორმაციას ვერ ასახელებს და ა.შ. რა თქმა უნდა, ეს ინფორმაცია სწორი არა არის და მათ სხვა გზა არ აქვთ, რომ არ ილაპარაკონ ასეთი აბსურდი.
სასამართლოს მოვახსენეთ ჩვენი სიტყვა და ბრალდების ირგვლივ ყველა იმ მტკიცებულებაზე ვისაუბრეთ, რაც ბრალდების მხარეს გააჩნია. ვისაუბრეთ იმ გარემოებებზე, თუ როგორ მოხვდა გიორგი შაქარაშვილი წყალში. თუ როგორ გარბის გიორგი შაქარაშვილი ეს ვიდეოჩანაწერშიც ჩანს, მოწმეებიც არიან ადგილზე და მადლობა ღმერთს, რომ ადგილზე იყვნენ და დაინახეს, როგორ მისდევდნენ და გაიგეს ხმები, რომ გიორგი შაქარაშვილს ჩაყვნენ ხიდის ქვეშ, დიახ, ახვლედიანს და ამირხანაშვილს ვგულისხმობ.
ასევე, სამედიცინო ექსპერტიზის დასკვნით დასტურდება ის გარემოება, რომ გიორგი შაქარაშვილს მრავლობითი დაზიანებები ჰქონდა სხეულზე და მისი გარდაცვალება წყალში დახრჩობით მოხდა. ხუთივე ბრალდებულმა, რომელსაც მკვლელობაში აქვს ბრალი წაყენებული, გიორგი შაქარაშვილი წყალში ჩააგდო. ამას ვარაუდით არ ვამბობთ, ამას მტკიცებულებების, ვიდეოჩანაწერის, მოწმეთა ჩვენებების საფუძველზე ვაცხადებთ. შ.პ.ს. “ელდერადოს” ვიდეოჩანაწერები ასახავს იმ გარემოებას, რომ გიორგი შაქარაშვილს მისდევენ. იმ ადგილზე, სადაც მკვლელობა მოხდა, სამწუხაროდ არ არის ვიდეოჩანაწერები, თუმცა, უამრავი მტკიცებულება არსებობს. პირდაპირი მტკიცებულებებია იმ პირების ჩვენებები, რომლებიც უახლოეს ტერიტორიაზე იმყოფებოდნენ, ესენი არიან გურამ ამირხანაშვილი და ვახტანგ ახვლედიანი. როცა გურამ ამირხანაშვილი თბილისში წამოიყვანეს, გზაშიც იყო საუბარი შაქარაშვილთან დაკავშირებით, ბრალდებულები ინტერესდებოდნენ, ისევე კარგად იცოდა თუ არა მან ცურვა, როგორც დარბოდა”, – აცხადებს ყაზარაშვილი.
შეგახსენებთ, ამ დროისთვის შაქარაშვილის საქმეზე დაკავებულია 17 პირი. პროკურატურამ 5 პირს განზრახ მკვლელობის მუხლით ბრალი დაუმძიმა. აღნიშნული 5 პირი, რომელთაც ბრალი ჯგურუფად ჩადენილი განზრახ მკვლელობის მუხლით დაუმძიმდათ, “ტოიოტა ქამრის” მგზავრები – ვახტანგ ჩიქოვანი, არჩილ გაგნიძე, ნიკოლოზ რევაზიშვილი, არასრულწლოვნები ა.ქ. და ზ.ხ. არიან. დანაშაულის დამტკიცების შემთხვევაში ბრალდებულებს 13-დან 17 წლამდე პატიმრობა ემუქრებათ.