დაღუპული 23 წლის პროგრამისტის, თამარ ბაჩალიაშვილის ოჯახის ადვოკატი, მიხეილ რამიშვილი “TV პირველის” ეთერში გარდაცვლილის ბებიას, რიტა ზურაბიშვილს პასუხობს.
როგორც რამმიშვილი აცხადებს, ის ზურაბიშვილს არ იცნობს და არც ის იცის, რას ემსხურება მისი ეს განცხადებები.
“არ ვიცნობ საერთოდ ამ ქალბატონს, წარმოდგენა არ მაქვს მასზე. ვინ მენდობა და ვინ – არა, არსებობს ქალბატონი თეონა, არსებობს ბატონი ჯუმბერი და თუ რამე კითხვა გაქვთ ჩემს ნდობა-უნდობლობასთან დაკავშირებით, მათ ჰკითხეთ. “იმედი” არის სამთავრობო ტელევიზია.
ეტყობა ამ ხელისუფლებას და სუს-ს ძალიან ვუშლი ხელს, ამ საქმისადმი ჩემმა მიდგომამ და ჩემს მიერ გამოჩიჩქნულმა დეტალებმა პრობლემა შეუქმნა სუს-ს იმიტომ, რომ მე ვნახე სამი ჯიპი, ვითხოვ ამონაწერებს და ა.შ. ახლა იწყებენ სამთავრობო კომპანიებიდან და მერე ალბათ ჩემს სიცოცხლეზეც გადმოვლენ.
შეეკითხეთ ქალბატონ თეონას, სანდო ვარ თუ – არა. თამუნას შეყვარებულის ჩვენებებიც მაქვს წაკითხული, ნიკა გეჯაძის მიმართ სიყვარულის კი რა მოგახსენოთ. მოწონება ერთია, სიყვარული – მეორე. ეს ბებია ორმოცზეც არ მინახავს და არც არანაირი ურთიერთობები არ მინახავს მასთან. მეათეხარისხოვანი ნათესავები არ ვიცი მე. ამდენი ხანია მათთან დავდივარ და იქ ბებია არავინ მინახავს.
როდის გამოჩნდა ასეთი ბებია, არ ვიცი. მე მიხდიან და მე ვასრულებ ვინმეს დავალებას? მაშინ ამ ქალბატონს მოუწევს ყველა იმ პირის დასახელება, ვის დავალებასაც მე ვასრულებ და თვითონ გადაიხდის ყველა ფულს. ჩემთვის უკვე ნათელია, რა დავალებასაც თვითონ ასრულებს – უნდათ ჩამოვშორდე საქმეს და ჩემი ღირსება და რეპუტაცია შელახონ. ამათი მიზანი ესაა იმიტომ, რომ ვერაფერს ვეღარ აკეთებენ, ვერაფერს! სუსი რომაა ამ საქმეში ჩართული, უკვე ნათელია და ახლა გამოჩნდა “ბებია”, ახლა გადმოვიდნენ ჩემზე” – ამბობს მიხეილ რამიშვილი.
ცნობისთვის, როგორც რიტა ზურაბიშვილი აცხადებს, “ბაჩანა ლობჟანიძე შექმნილი პიროვნებაა, ის გვარამიამ და ადვოკატმა შექმნეს“, მისივე თქმით, ის ოჯახის ადვოკატს, მიხეილ რამიშვილს არ ენდობა.
შეგახსენებთ, რომ თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი შაბათს სახლიდან გავიდა, ის სათვალთვალო კამერებმა ბოლოს თეთრიწყაროს რაიონში დააფიქსირეს.
მოგვიანებით, 23 წლის თამარ ბაჩალიაშვილი თეთრიწყაროს ტყეში, საკუთარ მანქანაში გარდაცვლილი იპოვეს. ერთ-ერთი ვერსიით, პროგრამისტის გაუჩინარება მის სამსახურეობრივ საქმიანობას უკავშირდება.