აშშ-ის პრეზიდენტი დონალდ ტრამპი აცხადებს, რომ არ აპირებს, ამერიკელებისთვის პირბადის ტარება სავალდებულო გახადოს.
„მსურს, ადამიანებს გარკვეული თავისუფლება ჰქონდეთ, ამერიკელებისგან პირბადეების ტარებას არ მოვითხოვ”, – განაცხადა ტრამპმა “Fox News”-თან ინტერვიუში.
მისივე თქმით, პირბადის ტარება კარგია, თუმცა არ ეთანხმება აზრს, რომ თუ პირბადეს ყველა ატარებს, ვირუსი გაუჩინარდება.
„თავიდან ყველა გვეუბნებოდა, არ ატაროთ პირბადეებიო, შემდეგ უცებ – პირბადე ყველამ უნდა ატაროსო. პირბადე კარგია, მაგრამ არ ვეთანხმები იმ აზრს, რომ თუკი პირბადეს ყველა ატარებს, ყველაფერი გაქრება”, – აცხადებს ტრამპი.
ცნობისათვის, აშშ-ის დაავადებათა კონტროლისა და პრევენციის ცენტრმა კორონავირუსის გავრცელების პრევენციის მიზნით პირბადეების ტარების რეკომენდაცია აპრილში გასცა.