კანადელმა ინფექციონისტმა, COVID-19-ის შესახებ სოციალურ ქსელში პოსტი გამოაქვეყნა და საზოგადოებას მოუწოდა ვირუსის არ შეეშინდეთ.
აბდუ შარკავი საზოგადოებას მოუწოდებს პანიკის ნაცვლად, ფაქტებს დაუჯერონ.
“20 წელზე მეტია, რაც ექიმი და ინფექციური დაავადებების სპეციალისტი ვარ. ამ დროის განმავლობაში უამრავი ავადმყოფი მინახავს. მე ვმუშაობდი ქალაქის შიდა საავადმყოფოებში, აფრიკის ყველაზე ღარიბ და მიყრუებულ ადგილებში. აივ-შიდსი, ჰეპატიტი, ტუბერკულოზი, წითელა, ჰერპესი, კრუნჩხვითი ხველება, დიფტერია – ეს იმ დაავადებათა მცირე ჩამონათვალია, რომლებსაც ამ წლების განმავლობაში შევხვედრივარ. მწვავე რესპირატორული სინდრომის გარდა, ძალიან ცოტა დაავადებას თუ შევუშინებივარ ან თავი მოწყვლადად უგრძნობინებია.
მე არ მეშინია Covid-19-ის. მე უფრო მეტად მაწუხებს ახალი ე.წ. ინფექციური აგენტის გავრცელება, რომელმაც მსოფლიო მოიცვა და რომელიც ფეხის მოკიდებას სხვადასხვა ნიადაგში ცდილობს. მაწუხებს მოხუცებულთა მდგომარეობა, რომელთა ჯანმრთელობაც შედარებით სუსტია და რომლებიც ამ პირობებში ყველაზე მეტად იტანჯებიან, მაგრამ მე არ მეშინია Covid-19-ის. ყველაზე მეტად იმ შიშის მეშინია, რომელიც მასობრივად გავრცელდა და საზოგადოება მოიცვა. იმ შიშის, რომელიც პანიკაში გადაიზარდა. მეშინია იმის, რომ N95 სამედიცინო ნიღბებს საავადმყოფოებიდან და გადაუდებელი დახმარების კლინიკებიდან იპარავენ. ადგილებიდან, სადაც მათი არსებობა ყველაზე საჭიროა. სამედიცინო ნიღბებით სავსეა აეროპორტები, სავაჭრო ცენტრები, კაფეები, რაც საზოგადოებაში შიშს კიდევ უფრო აძლიერებს და ადამიანებიც ერთმანეთს ეჭვის თვალით უწყებენ ყურებას. მეშინია, რომ ჩვენი საავადმყოფოები გადაიტვირთება ისეთი ადამიანებით, რომლებიც ფიქრობენ: „ ვიცი, რომ არაფერი მჭირს, მაგრამ მაინც უნდა გავესინჯო, არავინ არ იცის რა შეიძლება მოხდეს“.
ადამიანები, რომლებსაც გულის უკმარისობა, პნევმონია აქვთ იდგებიან გრძელ რიგებში იმისთვის, რომ ექიმებმა შეამოწმონ. ეს ეპიდემიური შიშები შეზღუდავს ვაჭრობას, დიდ ზიანს მიაყენებს სხვადასხვა სექტორში თანამშრომლობებს, დაარტყამს ბიზნესს და საბოლოო კულმინაციას გლობალურ ვარდნაში პოვებს. მაგრამ ყველაზე მეტად მაინც იმის მეშინია რას ვეუბნებით შვილებს მაშინ, როდესაც საფრთხის წინაშე დგებიან. იმის მაგივრად, რომ რაციონალურად და გონივრულად დაველაპარაკოთ, ვეუბნებით, რომ უნდა დაპანიკდნენ, ეშინოდეთ. ვირუსმა შეიძლება შემოაღწიოს ქალაქში, ჰოსპიტალში, მეგობრის სახლში, სამეზობლოში და შენამდეც კი მოვიდეს. ელოდე ამას და ნუ გაგიკვირდება. ფაქტი ისაა, რომ ვირუსი იმდენად დიდ ზარალს არ მოგვაყენებს, როგორც ჩვენივე ქცევები იზამენ ამას „საკუთარი თავისთვის იბრძოლე და ყველაზე მაღლა დააყენე“ დამოკიდებულება კი, შესაძლოა, მართლაც დამღუპველი აღმოჩნდეს. ჩვენ გვაქვს შესაძლებლობა ვისწავლოთ მეტი ჰიგიენისა და იმ წესების შესახებ, რომლითაც დაავადების გავრცელების შეზღუდვას შევძლებთ.
მოდით, ამ გამოწვევას ერთად, სხვების მიმართ გამოვლენილი თანაგრძნობითა და მოთმინებით შევხვდეთ. ვეძებოთ ფაქტები, სიმართლე და არ ავყვეთ სპეკულაციას. ფაქტები და არა შიში. დაიბანეთ ხელები. გაიხსენით გულები. ჩვენი შვილები ამისთვის მადლობას გვეტყვიან“,- წერს კანადელი ინფექციონისტი სოციალურ ქსელში.