ინფექციონისტ რევაზ მეჭურჭლიშვილის განცხადებით, კორონავირუსით ინფიცირებული სამი პაციენტის მდგომარეობა სტაბილურია. მათი ვირუსული დაავადება უსიმპტომოდ მიმდინარეობს. ამის შესახებ მეჭურჭლიშვილმა ჟურნალისტებთან განაცხადა.
როგორც ის აღნიშნავს, ინფექციური საავადმყოფოს ბოქსირებულ განყოფილებაში ამჟამად 24 ადამიანია მოთავსებული, საკარანტინო ზონაში კი 21 პაციენტი გადაიყვანეს.
„თბილისის ბოქსირებულ განყოფილებაში გვყავს 24 პაციენტი. გუშინ დღისით გვყავდა 36 პაციენტი, აქედან 24-ის ანალიზი წაიღეს ლუგარის ლაბორატორიაში. 19-ზე გვქონდა უარყოფითი პასუხი. მოხდა მათი კარანტინში გადაყვანა. სულ 21 პაციენტი გადავიყვანეთ კარანტიში, ანუ, ამ 19-ს პლიუს ძველი მიღებული 2. დარჩენილი პაციენტებიდან რამდენიმე პასუხი არის, თუმცა ისინი საკარანტინო ზონაში გადაყვანას მაინც არ ექვემდებარებიან. მათ აქვთ სიმპტომები, უბრალოდ არ აქვთ ეს დაავადება, შეიძლება ჰქონდეთ სხვა დაავადება. ასეთი პაციენტები, სულ 5 პაციენტი სხვა განყოფილებაში გვყავს მოთავსებული. ამჟამად, ანალიზის პასუხებს ველოდებით 5-ს, გუშინდელ წაღებულს და დღეს კიდევ 9 წაიღეს“,- განაცხადა ექიმმა.
რაც შეეხება საკარანტინო ზონიდან ინფექციურ საავადმყოფოში გადმოყვანილ სამ პირს, ინფექციონისტის განმარტებით, მათი გადმოყვანა ტემპერატურული ცვლილების გამო მოხდა.