“ვარწმუნებ მოსახლეობას, რომ ამ ეტაპზე საქართველოში არ არსებობს კორონავირუსის ფართოდ გავრცელების რისკი და შესაბამისად, ეპიდემიის საფრთხეც არ არსებობს”, – ამის შესახებ დღეს, მთავრობის სხდომაზე ჯანდაცვის მინისტრმა, ეკატერინე ტიკარაძემ განაცხადა.
მისივე განმარტებით, ვირუსის დროულმა აღმოჩენამ შემდეგი გავრცელების რისკი შეამცირა. ჯანდაცვის მინისტრის განცხადებით, ამ მიმართულებით მუშაობა 24-საათიან რეჟიმში გრძელდება.
„გუშინ ღამით ინფექციური საავადმყოფოდან იმ 13 პაციენტის გადაყვანა განხორციელდა საკარანტინო ზოლში, რომლებიც არ იყვნენ ინფიცირებულები. ამ დროისთვის ინფექციურ საავადმყოფოში იმყოფება 10 პაციენტი, აქედან 5 იტალიიდან ჩამოვიდა – 1 იტალიის მოქალაქეა, 4 კი ქართველია. 5 არის ირანიდან – 1 არის ქართველი, დანარჩენები არიან აზერბაიჯანის მოქალაქეები. ჩვენ ვაგრძელებთ კოორდინირებულ მუშაობას. ამ დროისთვის გვაქვს საკმარისი ადგილები, რათა მოვახდინოთ იმ მოქალაქეების კარანტინში განთავსება, რომლებიც ახლო კონტაქტში იმყოფებოდნენ ინფიცირებულ ადამიანებთან და მოდიან საქართველოში მაღალი რისკის ზონებიდან. ასეთი ლოკაციები საქართველოში სხვადსხვა ადგილზე გვაქვს. ვზრუნავთ, რომ მათ ჰქონდეთ შესაბამისი პირობები. ასევე, მობილიზებულია საავადმყოფოები, რომლებიც განლაგებულია როგორც ქუთაისში, ასევე ბათუმში და არის რამდენიმე საავადმყოფო თბილისში. მე ვარწმუნებ ჩვენ მოსახლეობას, რომ ამ ეტაპზე საქართველოში არ არსებობს იმის რისკი, რომ მოხდეს კორონავირუსის ფართოდ გავრცელება და შესაბამისად, ეპიდემიის საფრთხე არ არსებობს. ჩვენ 24-საათიან რეჟიმში კვლავ გავაგრძელებთ მუშაობას ამ მიმართულებით”, – განაცხადა ტიკარაძემ.
შეგახსენებთ, ახალი კორონავირუსის პირველი შემთხვევა გუშინ, 26 თებერვალს დადასტურდა საქართველოში. ჯანდაცვის მინისტრის, ეკატერინე ტიკარაძის განცხადებით, ვირუსი დაუდგინდა მოქალაქეს, რომელიც აზერბაიჯანის გავლით შემოვიდა საქართველოში.
ინფიცირებული საქართველოს მოქალაქეა.