კორონავირუსის პრევენციის მიზნით, ირანიდან საქართველოში და პირიქით, ფიზიკური პირების გადაადგილების შეზღუდვის შემდეგ, საქართველოს მთავრობა არ გამორიცხავს, გადაადგილება ქვეყნის სახმელეთო საზღვარზეც შეიზღუდოს.
ამის შესახებ განცხადება საგარეო საქმეთა სამინისტრომ გაავრცელა.
“მთავრობის გადაწყვეტილებით, ამ ეტაპზე შეჩერდება მგზავრების შემოყვანა ირანიდან საქართველოში. ავიაკომპანიებს შესაძლებლობა ექნებათ ცარიელი თვითმფრინავებით შემოვიდნენ საქართველოს სივრცეში, რათა ტურისტად მყოფმა ირანის მოქალაქეებმა შეძლონ ირანში დაბრუნება. ამ ეტაპზე, გადაადგილებისთვის დარჩება სახმელეთო საზღვარი, თუმცა დაწესდება მკაცრი შეზღუდვები და აღნიშნული მიმართულებით, აქტიურად ვმუშაობთ მეზობელ ქვეყნებთან. საქართველოს მთავრობა აკვირდება მოვლენების განვითარებას და ასევე განაგრძობს მუშაობას მეზობელ სომხეთთან და აზერბაიჯანთან. მომავალში, თუ ამის საჭიროება დადგა, არ გამოვრიცხავთ სახმელეთო საზღვარზე გადაადგილების შეზღუდვასაც. საქართველოს მთავრობამ უკვე გააფრთხილა საქართველოს მოქალაქეები თავი შეიკავონ ირანში მგზავრობისგან, ხოლო ირანში მყოფ მოქალაქეებს, საჭიროების შემთხვევაში, შეუძლიათ დაუკავშირდნენ საქართველოს საელჩოს თეირანში (+989122997726 ცხელი ხაზის ნომერი)“ , – აღნიშნულია საქართველოს საგარეო საქმეთა სამინისტროს მიერ გავრცლეებულ განცხადებაში.
შეგახსენებთ, ბოლო მონაცემებით, ირანში კორონავირუსით რვა ადამიანი დაიღუპა, 43 კი ინფიცირებულია.