ლაგოდეხის, მარტვილისა და ადიგენის შუალედურ არჩევნებში „ოცნების“ კანდიდატებმა გაიმარჯვეს

ცესკომ საკრებულოს შუალედური არჩევნების წინასწარი მონაცემები გამოაქვეყნა. ლაგოდეხში, მარტვილში და ადიგენში „ქართული ოცნების“ კანდიდატები იმარჯვებენ.

კერძოდ, ცესკოს წინაწარი მონაცემებით, ლაგოდეხის მუნიციპალიტეტის აფენის თემში „ქართული ოცნების“ კანდიდატმა ომარ შველიძემ ხმების 84.4 % მიიღო, „ევროპული საქართველო – მოძრაობა თავისუფლებისთვის“ კანდიდატმა მალხაზ მელაშვილმა ხმების 14.71 % , მესამე ადგილზე კი მოძრაობა „თავისუფალი საქართველოსთვის“ კანდიდატი დავით ბეგლარიშვილი გავიდა ხმათა 0.89 % -ით.

მარტვილში, კიწიის თემში 549 ხმა მიიღო და საკრებულოს დეპუტატი გახდა „ქართული ოცნება-დემოკრატიული საქართველოს“ კანდიდატი რობერტ კაკულია. აღსანიშნავია, რომ ის შუალედურ არჩევნებში ერთადერთი კანდიდატი იყო.

საკრებულოს დეპუტატი გახდა ასევე ადიგენის მუნიციპალიტეტის არალის თემშიც „ქართული ოცნების“ წარმომადგენელი ზურაბ ფეიქრიშვილი.