“ხორავას ქუჩის საქმედ” ცნობილი სასამართლო პროცესი დღეს გაიმართა, სადაც ოთხი მოწმე დაიკითხა. მიხეილ კალანდიას ადვოკატმა, ზურაბ თოდუამ პროკურორს შუამდგომლობით მიმართა და მოითხოვა ყველა სხდომის გასაჯაროება.
“პროცესის გახსნის შუამდგომლობა დღეს არ გაჟღერებულა, როგორც ჩემთვის გახდა ცნობილი, აღნიშნული შუამდგომლობით მიმართეს ბრალდების მხარეს, თუმცა ჩვენამდე ეს შუამდგომლობა არ მოსულა,” – განაცხადა საქმის პროკურორმა.
თუმცა, თოდუა აცხადებს, რომ გენერალურ პროკურორს შუამდგომლობა წაკითხული არ აქვს, რადგან ის კონსტანტინე გამსახურდიას “დიდოსტატის მარჯვენას” კითხვითაა დაკავებული. მისი თქმით, დაკითხული 4 მოწმიდან არცერთი არ იძლევა ინფორმაციას, რომ მიხეილ კალანდიამ ჩაიდინა შერაცხული ბრალით გათვალისწინებული დანაშაული.
შეგახსენებთ, რომ მიხეილ კალანდია ხორავას ქუჩაზე დავით სარალიძის ჯგუფურად დამამძიმებელ გარემოებებში ჩადენილი მკვლელობის ბრალდებით სამართალდამცავებმა 4 ივნისს დააკავეს. მას აღკვეთის ღონისძიების სახით პატიმრობა 6 ივნისს შეეფარდა.