დღეს, უკრაინაში ვადამდელი საპარლამენტო არჩევნები იმართება. არჩევნებში 22 პარტია მონაწილეობს, რომელთა პარტიულ სიებში 2 747 კანდიდატია. ერთმანდატიან მაჟორიტარულ ოლქებში სულ 3 083 კანდიდატი იყრის კენჭს.
წინასწარი პროგნოზით, მეცხრე მოწვევის რადაში ხუთი პარტია შევა. ფავორიტი უკრაინის პრეზიდენტის, ვლადიმირ ზელენსკის პარტია „ხალხის მსახურია“, მეორე ადგილზე კი არის ვიქტორ მედვედჩუკის „ოპოზიციური პლატფორმა სიცოცხლისთვის“, რომელსაც ამომრჩეველთა 12 პროცენტი უჭერს მხარს. რადაში ასევე მოხვდებიან უკრაინის ყოფილი პრეზიდენტის, პეტრო პოროშენკოს პარტია „ევროპული სოლიდარობა“, იულია ტიმოშენკოს „ბატკივშინა“ და როკმუსიკოს სვიატოსლავ ვაკარჩუკის „გოლოსი“.
არჩევნებში მონაწილეობდა საქართველოს ექსპრეზიდენტი, ოდესის ოლქის ყოფილი გუბერნატორი მიხეილ სააკაშვილი მისი პარტიით – „ახალ ძალთა მოძრაობა“, თუმცა 19 ივლისს სააკაშვილმა განაცხადა, რომ მისი პარტია ხუთპროცენტიან ბარიერს ვერ გადალახავს და ამიტომ, მოუწოდა მხარდამჭერებს, ხმა ზელენსკის პარტიას მისცენ.
არჩევნების მთავარი ინტრიგა იმაში მდგომარეობს, „ხალხის მსახური“ უმრავლესობის დამოუკიდებლად მოპოვებას შეძლებს, თუ კოალიციის ფორმირება გახდება საჭირო. რადაში სულ 424 ადგილია.
რადას ვადამდელი არჩევნების წინასწარი შედეგი საღამოს გახდება ცნობილი. ეგზიტპოლების შედეგები 21 ივლისს, საღამოს გამოქვეყნდება.
მეცხრე მოწვევის რადას პირველის სხდომა 9 სექტემბრამდე უნდა გაიმართოს.