მოკლული დავით სარალიძის მამა ზაზა სარალიძე აცხადებს, რომ კალანდიების ოჯახში პირველი მირზა სუბელიანის ცოლი მივიდა. მისი თქმით, ამ ინფორმაციას ის ამ დრომდე არ ასაჯაროებდა. მოკლული მოზარდის მამა მირზა სუბელიანის და მისი ოჯახის წევრების პასუხისგებაში მიცემას და დასჯას ითოხვს.
სარალიძე საპროტესტო აქციებს აანონსებს და მთავარი პროკურორის გადადგომას ითოხვს. საზოგადოებას კი გვერდში დგომისკენ მოუწოდებს:
მთელ საქართველოს მოვუწოდებ, ყველა შვილმკვდარ მშობელს, დამიდგეს გვერდით, დღეს ჩემი შვილის მკვლელები დაჭერილები არ არიან,“- აცხადებს სარალძე
თბილისის საქალაქო სასამართლოს მოსამართლე ეკა არეშიძემ, 6-თვიანი დახურული სასამართლო განხილვის შემდეგ, ხორავას ქუჩაზე მოკლული №51 სკოლის მოსწავლეების, ლევან დადუნაშვილისა და დავით სარალიძის მკვლელობის საქმეზე სარეზოლუციო ნაწილი გამოაცხადა და დავით სარალიძის მკვლელობაში ბრალდებულს მუხლი გადაუკვალიფიცირა. ის დამნაშავედ არა განზრახ მკვლელობაში, არამედ მცდელობაში სცნო. მეორე ბრალდებულიც სარალიძის მკვლელობაში უდანაშაულოდ გამოაცხადა, ხოლო დადუნაშვილის მკვლელობაში სრულიად დამნაშავედ სცნო.
მოკლული დავით სარალიძის მამა აცხადებს, რომ ამ გადაწყვეტილების გამო, მთავარი პროკურორი ირაკლი შოთაძე უნდა გადადგეს. ის ქართველ საზოგადოებას ქუჩაში გამოსვლისკენ მოუწოდებს და აქციებს აანონსებს.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა. განზრახ მკვლელობის მუხლით დაკავებულია 2 არასრულწლოვანი, ხოლო დანაშაულის დაფარვის მიზნით პასუხისგებაში 5 პირია მიცემული. საქმეზე სასამართლო პროცესები მიმდინარეობს.